 |
| 相片連結 |
我諗…係咪每個人遇事反應都差不多一樣? 從心焦如焚, 到妥協認命?
當狗狗身體狀況出現異常, 自己會諗究竟衰咗邊樣, 小事好似皮膚敏感, 泛紅或者濕疹, 首先會諗係咪有關食糧, 於是嘗試轉糧, 轉鮮食, 然後諗四周圍環境, 跟住會見醫生...食藥; 幸運嘅可以醫好, 但好多皮膚病, 其實唔一定可以根治到!
然後又講到狗狗嚴重甩毛, 以往可能互聯網無咁先進, 無咁方便睇到各種資訊, 呢種案例好少接觸; 正如以前我叻叻甩毛, 從來唔知有所謂Alopecia X, 呢種謎一樣嘅病症點做都做唔好!
今時今日見到超多脫毛症嘅狗狗, 見到家長好心急用盡辦法去挽救, 幸運嘅可以生返毛毛, 而其實有咗脫毛症, 要擺脫又係好講彩數!
呢兩種問題我都曾經碰到, 波波細時皮膚就唔好, 而達達又甩毛, 我都諗盡辧法想醫好; 我好幸運, 佢哋算係跨過咗呢步, 呢個問題目前唔需要再關顧!
但一山還有一山高, 身體狀況複雜到好多嘢係解決唔到, 一路走來有十萬個難題要應付, 都只可以見步行步; 今日我有D領悟, 原來好多嘢無得話你努力去做, 就可以做得好!
網上見到有狗狗爛皮膚, 家長想盡辦法都醫唔好, 最後都只求幫狗狗可以舒緩到, 唔痕唔挍就好, 皮膚醫唔好都無符!
又正如脫毛症狗狗, 唔係一定可以醫好, 事實之前叻叻就係醫唔到, 一直做隻光豬仔到老; 今日見好多毛孩家長為咗脱毛症拼全力, 希望可以維護到剩餘嘅毛毛, 想當日我為達達都全力以赴, 當然可以生得返就最好!
但大多都係事與願違, 到最後只好著靚衫, 狗狗就做無毛寶寶!
 |
| 原來波波同叻叻都有相近嘅style😀 |
今日, 我要面對嘅難題又再進一步, 波波嘅蛋白尿, 腎功能唔好, 再加上眼仔睇唔到; 達達嘅腦退化, 神經問題都係根治唔到!
原來以前面對嘅只係小問題, 對身體健康咁大嘅課題, 只係冰山一角, 原來有更多更多難題係會解決唔到; 波波眼仔睇唔到我極心痛, 其實佢接受得比我好, 見佢依家敢行大D範圍嘅地方, 我一定配合為佢做好; 琴日再將門框包防撞膠, 再睇吓仲有咩可做; 今日我已經接受與病共存, 諗辦法配合比寶貝活得舒服!
 |
| 依家可以慢慢行入走廊喇 |
原來世事係無完美, 完美與否係視乎自己睇嘢嘅角度, 以前我總執著於每件事都要做到最好, 有些微瑕疵都會唔舒服; 今日, 從我嘅寶貝身上終於學懂, 無所謂完美, 要學習放鬆!
如果波波腎功能不全係唔可能醫好, 咁維持到個仔食得瞓得精神好, 已經係完美結局, 就算化驗指數有幾好幾唔好, 自問有努力去做, 只要對佢正常生活影響唔大, 我算數!
如果達達腦神經傳導唔好, 可以控制到佢無抽筋就已經好好,腦退化問題只好盡力照顧, 只求佢唔辛苦, 希望可以維持到基本生活質素!
今日我嘅願望就只係與病共存, 再無奢望, 接受事實, 全力以赴, 盡力做好, 就係我追求嘅完美結局!
閒時同兩隻豬出去曬吓日光浴, 每日仲可以同兩隻豬出去行吓都好好, 再帶佢哋探吓貓貓, 試吓交朋友仔刺激吓, 反應都OK呀😊!
試睇嘢用一個新角度, 當佢哋健康平穩就唔好諗日後會幾嚴重, 活在當下係要學習嘅第一步; 仲要學習遇事唔好咁騰雞, 要冷靜應付, 不過, 呢樣...我都係頗難做得到😂!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
