波波依家要長期食西藥, 要維持住無蛋白尿, 化驗指數正常, 雖然效果良好, 但我都係擔心會對佢肝臟有影響; 事實呢個仔對西藥好敏感,根據過去觀察總會出現不良狀況, 無奈努力嘗試其他方案都幫唔到蛋白尿指數下降, 都只好妥協用西藥!
當然, 用咗西藥亦唔代表健康一切都正常, 一個指數亦唔可以反映出身體嘅狀況, 雖然依家蛋白尿指數好好, 但有無影響其他器官損傷? 我都祇可以觀望!
目前佢情況算係穩定, 我就比大家一個break, 太過杞人憂天, 杯弓蛇影徒添壓力, 反正擔心對件事無幫助, 唯有見招拆招叫自己放鬆D, 不過放鬆之餘, 都想為佢個肝仔比適量補充, 做個預防!
今次選用咗奶薊草 Milk Thistle, 選用粉劑我比較易餵, 決定用呢隻supplement前亦emailed咗比生產商, 確定同蛋白尿藥無conflict, 咁就放心比佢食!
我已經無再去諗點做係最好, 反正我點做都感覺力有不足, 對於波波同達達嘅身體健康, 我祇可以盡力!
Link: Milk Thistle
https://www.herbsmithinc.com/milkthistle/
https://www.1kanbo.com/product.php?categoryid=95
https://formulawave.com/milk-thistle-benefits/
今日喺FB度睇到有毛孩嘅家長感言, "照顧一隻老人家坦白講有可能比照顧一位初生BB更加辛苦，更大壓力"仲有好多認同嘅留言, 我都有相同感受, 但人哋嘅老人家都有 15, 6歲喇, 我兩隻豬唔使咁早卦😢!
不過身體狀況無得比較, 唯有盡力照顧啦, 養咗呢班豬仔真係訓練咗我嘅耐性, 唔食會慢慢𠱁, 唔會鬧佢哋曳曳咁揀食!
以前, 我會好掹, 點解咁挑食, 亦都無心機一啖啖餵食; 但之後狗狗離開後, 就會反省, 挑食大都因為身體唔舒服, 影響咗胃口, 會好自責點解當日咁無耐性!
養狗狗都一樣學無止境, 永遠有新知識, 我對狗狗一代比一代寬鬆, 到呢 3隻豬, 真係無試過苛責過一聲!
越養越無宗旨, 越來越變咗怪獸媽媽, 祇有縱容寵愛, 無分對錯規定; 兩隻豬已經十一歲半, 仲有幾耐相伴時間吖? 我唔想日後再有遺憾自責, 怪自己愛得不夠喇!
係呀, 佢哋真係大晒㗎, 無影響到他人嘅大前題下, 我比佢哋活得任性!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
