2018年4月5日星期四

再續前緣

喺養豬豆嘅日子, 唔止一次覺得佢好多動態好熟識, 我覺得佢好似叻叻, 不過呢個念頭一閃即過, 我覺得係自己諗多咗, 但好真實我有呢種感覺已經好多次啊!

叻叻係2006年6月離開我, 豆b同波波同年嘅9月出世, 會唔會真係叻叻返來搵我?
不過又好似有D複雜咗, 因為遇到豆b真係緣份, 無得plan啊!

因為掛住叻叻, 喺佢走咗之後好希望同佢再續前緣, 不由自主咁成日行咗去D寵物店, 好希望會見到翻版嘅叻叻啊, 半年來見過好多狗狗, 但無特別感覺; 同年12月無準備下遇到波波, 從無想過要咁細個嘅BB, 唔敢湊啊!

當時嘅波波祇得手掌咁大, 黑黑嘅毛無一的似叻叻, 但見到波波就有一種吸力, 完全唔想放手, 完全唔想比佢再離開我, 當日就決定帶佢走; 下意識就將對叻叻嗰份愛, 直接過戶咗比波波, 呢個係唯一可以解釋到, 點解我會特別鍚波波, 可能波波同叻叻係有D牽連, 冥冥中註定佢要跟我!
我好錫波波, 但老實講, 我無喺波波身上感覺有叻叻嘅影子, 只係我對佢嘅愛, 有如排山倒海, 好自然就付出等同對叻叻嘅愛!

世事好奇妙, 無諗過會遇到豆b, 更無諗過佢會喺4歲時跟咗我, 緣份呢樣嘢真係註定咗?
養咗豆b後, 好多次見到佢同叻叻一樣嘅動作, 佢哋樣貌當然唔同, 但神態動靜好多一樣, 反而喺豆b身上, 我感覺到叻叻啊; 但我無同任何人講, 我都覺得係自己傻諗多咗, 但呢個係千真萬確嘅感覺, 因為呢個感覺, 我對豆b錫多咗好多!

可能註定我同叻叻可以再續緣份, 但要通過波波, 先比豆b接近到我!
上天安排得好奇怪, 點解會養咗波波, 再遇返佢嘅同胎, 然後我會喺豆b身上feel到叻叻, 唔直接來自波波?
或者呢個安排來自叻叻, 將愛分散開, 一分為二無咁吃力去愛; 不過對twins係唔可以分開, 即使因緣際遇從細就分開咗, 四年後兜兜轉轉都遇返豆b, 仲跟咗我, 最終都成就咗一份完整嘅愛💕!

今日係清明節, 我個腦就一整日諗住豆b同叻叻, 我真係傻咗😖!