似乎我能夠過嘅安樂日子真係好短暫, 波波情況稍為穏定, 又輪到達達要煩; 不過老天爺都算格外開恩, 無比我A＋B套餐, 如果兩隻豬一齊上我都唔知點辦, 要集中精神照顧都好難!
開始有負面想法, 對handle兩隻豬嘅健康無晒把握, 雖然係AB餐一個一個上, 但都係好難哽下, 開始驚我哋相聚仲有幾耐時間😢, 發起癲要同佢哋影番D合照喇!
 |
| 波波毛毛豐滿咗😙 |
雖然突然跳出呢種想法, 但我一向有耐力打仗㗎, 要我放棄好難, 一定會想盡辦法; 大前題都係無變啦, 祇要生活無痛苦就好, 唔會做有入侵性嘅檢查, 唔會希望佢哋辛苦咁延長時間; 年紀老大, 每一日嘅相聚都係bonus, 我會好珍惜每個共渡嘅時刻, 呢兩隻豬, 應該係我最後養嘅狗狗, 有朝一日同佢哋話別, 應該都係時候, 結束我幾十年養狗生涯喇, 所以就算有需要幾辛苦照護, 我都會享受每一次互動, 會好好記住我哋相守嘅每分鐘; "不在乎天長地久, 祇在乎曾經擁有"嘛!
寫吓寫吓眼都紅晒, 其實佢哋情況又唔係咁差嘅, 波波仲多咗好多毛毛, 不過佢哋時好時壞, 係都要挑戰我極限, 可能近日達達有抽筋傾向, 挑起往日同叻叻抗病嘅經歷, 真係好傷, 抽筋我最怕, 所以突然有感而發😞!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
