 |
| 相片連結 |
人真係好難返轉頭, 習慣有工人姐姐幫手, 一吓間要自己全盤接手, 都幾辛苦㗎; 不過都仲可以頂落去, 因為兩隻豬仔算爭氣啦!
波波真係好乖, 好懂事唔使我擔心, 一切作息正常胃口好好, 我超滿足; 達達就胃口比較反覆, 時好時壞, 不過即使佢唔肯食時, 都唔需要用針筒強灌, 祇係要用匙羹一啖啖餵, 感恩佢肯吞又唔抗拒, 已經好好!
祇要有空間比我照顧, 我唔怕辛苦, 年紀大咗身體健康出現邊種變化, 好難估計到, 我祇求佢哋無大痛苦, 每日可以平穩過渡, 開心就好!
呢幾日天氣熱到失控, 阿女同老公都再三叮囑, 叫我千萬唔好帶兩隻豬出去, 咁嘅天氣會熱到溶; 我都有親自落樓下探路, 是否可到平台活動, 但一出去熱浪撲面而來, 實在唔敢莽動, 萬一中暑點後悔都無用!
留喺屋企開大冷氣都好舒服, 反正我一向都認宅女係歸宿😆!
 |
| 開住冷氣瞓涼感墊, 好舒服吖! |
買咗個靚靚松松地墊, 好厚好軟熟, 以為波波睇唔到需要適應質感唔同, 但個仔好叻適應得好從容, 反而達達接受有難度; 達達一向都係咁, 品性難移我信服!
剛將相片放上FB分享, S媽媽話放咁大隻豆b喺門口, 我都無咁諗過, 一睇又真係有D似喎😌, 豆b一向都鍾意瞓嗰度, 就當同豬豆再相逢😍!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
