2018年5月9日星期三

準時返嚟

姐姐出門前話要同佢哋影張合照喎, 豬仔無咩mood😝

工人姐姐約滿返菲喇, 已經續咗新約, 深信佢會如期返嚟, 睇返上一次我論盡工人嘅post, 原來係2016, 咁即係我平安過渡咗咁長日子, 無咩事令我特別激氣喎!

想當年我請工人真黑仔, 好感恩同呢個姐姐算夾得嚟, 佢最大優點係好鍚我嘅豬仔, 都真係幫輕我好多家務雜細; 佢要求 3星期大假, 無問題啦, 最緊要準時返嚟😝!

習慣咗有姐姐幫頭幫尾, 一吓乜都要自己嚟都幾係, 不過最緊要兩隻豬爭氣, 健健康康我就無閉翳, 所有嘢都可以慢慢嚟, 就住自己能力放鬆無所謂啦!

今日同兩隻豬沖返個涼先, 善後功夫咁多真係唔想自己清洗, 其實用咗烘毛機後已經無咩要跟進, 毛毛亦唔會飛到通處係, 不過都比我偷吓懶, 懶埋今日就要開行turbo掣😁!

達達身體無礙我先敢同佢沖洗, 之前邊敢放佢落水, 怕佢抽筋又突然嚟, 今日佢好叻豬仔, 好平靜浸完微泡, 放佢烘毛時佢乖乖伏低😘!

波波沖涼一向易話為, 係之前眼仔睇唔到佢有緊張, 要我用雙手環抱佢身體, 依家已經習慣就無問題喇; 唔知係佢食咗呢隻眼仔supplement有幫助, 還是佢之前角膜受傷嘅關係, 我感覺佢又feel到光暗, 我用小電筒照佢會咪眼仔, 所以佢行得好咗, 亦放鬆咗好多!
今日同佢沖完涼吹乾毛毛, 毛毛好鬆好似個波, 幾靚仔喎😍😚!

自己個仔變到點, 都係點睇都咁靚仔嘅!