琴日同達達見咗醫生喇, 我諗同佢哋出去, 最攰就係去呢種地方, 真係攰到成個散曬; 達達返到屋企就一直瞓覺, 我琴晚都早咗瞓喇!
去動物診所真係有一定壓力, 毛孩一定有不安感應, 而家長又會擔心診斷到嚴重病情, 整個過程都大壓力!
等咗超過一小時先見到醫生, 不過達達都睇咗個多小時, 本來我想達達做個心電圖睇吓心仔有無事, 咁瞓著大叫狀似休克真係好驚, 怕係心臟有事嘅反映; 但醫生問咗我一D問題, 亦聽診咗心肺好耐, 現階段唔覺有心臟病徴; 佢話觀察住先, 希望唔會有更壞情況, 佢睇埋達達手腳抽筋嘅短片, 都似係微循環出問題, 咁暫時無謂比達達不必要壓力!
其實我明白唔做深入檢查, 一切衹係靠臨床經驗估計, 但當然我唔會因為咁去麻醉做MRl咁無謂, 不過醫生都有建議, 如果達達情況進一步變壞, 可以試用高壓氧, 嘗試修復受損嘅細胞, 達達情況似血液循環差, 都皆因細胞老化啦!
琴日檢查過達達, 因為佢不停乞嗤有鼻水, 朋友提醒我會唔會有腦積水從鼻仔流出嚟, 但醫生話如果係咁, 我一定會見到明顯徵狀, 但琴日見達達表現正常, 協調方面無問題!
我求教醫生, 達達鼻水問題纏繞咗好耐喇, 我已經想盡辦法, 試過中、西、草本、順勢藥都唔work, 都唔識幫佢啦, 醫生教咗我另一方法!
佢話人同動物鼻嘅上方都有兩個囊, 人鼻敏感好多時都提議噴鼻清洗乾淨, 無嘢積聚嗰處鼻仔就可舒暢; 但達達咁細真係好難實行清洗, 醫生叫我用霧化器去幫; 用天然抗生素(膠體銀)稀釋比達達吸入鼻孔!
醫生幫我計算好稀釋度, 叫我通過霧化器幫達達, 雖然唔直接, 但做多幾次應該可以幫到若干!
 |
| 達達真係好乖好合作 |
目前手腳抽筋問題, 因為達達係清醒, 都指向血液流通有阻滯, 屬意用supplement去幫; 醫生同意CBD oil對達達有幫助, 持之以恆應該見到效果; 我再請教腳仔無咩力問題, 佢話既然我咩都試過, 有用艾灸, 無針針灸, 紅外缐, 塲效應, 仲加埋按摩; 可以考慮試試脈衝, 因為好多動物做咗有好好效果!
我聽朋友講過, 佢細狗接受唔到, 可能大狗接受度較高, 呢個建議我會考慮清楚, 再決定是否試做!
好多謝醫生琴日耐心解釋, 詳細分析亦比咗好多不同意見我, 即使日後萬一達達情況差咗, 我都仲有不同option去幫, 唔會咁無助, 而最感恩醫生嘅建議都係無入侵性無傷害, 咁我安心好多!
不過, 當然希望達達用supplement就OK囉!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
