距離上次喺梁醫生度幫波波驗蛋白尿, 都有三個幾月喇, 單靠中藥幫唔到波波, 上次個ratio 0.597唔合格, 梁醫生都叫唔使再返去覆診喇!
感激馮醫生, 瞭解波波情況, 配合佢諗個最好方案, 今次用返西藥, 指數下降返到0.168, 好正常👍; 祇要唔會令個仔身體不適, 我都接受咗用西藥, 亦唔再太在意個化驗報告, 做個指標行啱路當然好, 反之都係做得嘅盡做, 但求keep到生活作息正常😊!
達達算情況穩定, 唔可以叫做好好, 拎住個碗遞比佢肯食, 但要手抱😓; 咁扭計當然唔好, 但肯自己食, 唔使一羹羹餵已經有進步, 都係方針一樣, 做得嘅就盡做!
間中就比佢落水浮住試步, 幫佢強化吓肌肉都好, 不過呢隻豬, 每次反應唔同, 佢有反抗都唔敢強來, 配合佢就好!
早兩日朋友A拎咗一粒脫水湯粒比兩隻豬仔試味道, 佢知道我兩隻豬挑食難討好, 佢覺得呢款湯好方便, 用嘅材料都好好; 睇過介紹都幾好, 不妨比佢哋轉吓味道!
波波好乖好快飲晒, 達達嘛, 聞吓舔吓走鬼埋, 呢個公主好麻煩; 結果我訂咗全部三款, 睇吓有無一款會夾到個刁蠻公主鍾意嘅味道啦😋!
工人姐姐應該今晚返, 我終於唔使再捱世界, 可以瞓個好覺; 達達已經落返網床同波波一齊, 希望再唔使我時刻監察, 我寧願花D時間做保健啦😚!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
