 |
| 無晒心機嘅可憐豬仔 |
琴日旁晚放兩隻豬仔上大床, 我會幫佢哋做按摩, 呢個係我哋每日必有嘅親子時間!
當時我面向達達, 波波在我身後, 突然就聽到佢慘叫, 係接二連三不停大聲叫喊; 我即時回頭望, 見佢已經企唔到, 縮起右腳, 嘶心裂肺表情痛苦大嗌!
但佢衹係距離我不足一尺, 我肯定佢無從高處墮下, 發生乜事會突然嗌得咁慘? 肯定好痛喇; 我輕輕力摸吓佢腳仔, 佢惡到想咬人拼命掙扎, 我腦中即時嘅聯想係佢挫到膝關節? 扯傷肌肉? 更嚴重就係韌帶撕裂...都應該係呢類相關嘅疼痛啦!
波波呢種腳痛有前科, 最近一次係大概三年前, 其實呢段咁長嘅時間, 可以保住佢無痛我已經好心足, 況且今時今日亦可以用自然療法去幫助, 用針灸筆, 用紅外線照射, 加上順勢療劑同熱敷, 一直效果好好!
我完全無諗過要帶佢見醫生, 呢類傷患最重要係比佢休息, 需要時間修復, 其實最主要係我唔想再用西藥止痛, 已知佢腎仔唔好, 唔想再加重佢肝腎work load!
講真西藥都不外乎消炎止痛放鬆肌肉, 然後醫生大都叫困籠少郁動, 唔通會做手術咩, 叫我都唔會做啦; 波波都經歷過幾次腳痛, 我都知大概要點做!
當然仍要觀察佢有無惡化, 有需要見醫生時我都要屈服😓!
無論扯傷肌肉還是關節移位嘅痛, 就算更嚴重嘅關乎韌帶損傷都好, 都主要係休息比時間佢康復, 我一方面比佢順勢藥止痛, 另一方面用紅外缐燈, 用針灸筆照射, 再加豆袋熱敷; 經過咗一晚休息波波有好轉, 無再叫痛!
但佢右腳仍唔敢用力, 坐低起身嗰一吓會唔夠力有擺動, 但起碼VV同poo poo都可以就住轉圈, 亦無影響佢胃口, 我無好似以前咁驚惶失措喇, 當然聽到佢尖聲大叫仍免不了心亂肉痛!
人生無風平浪靜, 一定有或大或小衝擊, 近期兩隻豬仔比咗我一小段時間歇息, 過咗一段平靜日子我好感激; 波波今次衹係一個小衝擊, 幫佢過度我應該有能力, 亦感覺自己比以前冷靜, 除咗佢大聲尖叫, 又未知發生乜事係有D驚😝!
 |
| 今日有返D笑容喇! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
