 |
| 相片連結 |
達達用咗幾日順勢療劑新組合, 每逢食嘢佢都仲會打乞嗤, 感覺一刺激佢咽喉就難忍, 似乎都真係有關佢喉嚨問題, 唔通真係扁桃腺腫脹引起乞嗤問題?
乞嗤情況未見到明顯改善, 但鼻水見到係少咗好多, 有改進好感恩喇!
佢仍然無胃口, 餐餐要手餵, 但對風乾零食好著迷; 既然係咁, 琴日叫老公去買dear deer鹿心鹿肉, 幫補吓啦, 驚佢吸收不足就死火啦; 唔明點解佢食零食又無問題, 但都唔考究咁多, 佢肯食係大前題, 保持體力為上計, 其他容後再一步步拆解問題啦!
又收到CBD oil, 不停為兩隻豬補給療劑, 我唔知係加咗順勢療劑對達達抽筋有幫助, 還是CBD oil 嘅功效; 一開始用呢隻油都睇過說明, 話要見到效力要4-5個月時間, 咁有可能到依家先見到療效, 都一樣唔考究喇, 見好就繼續去馬!
 |
| 明明好咗好多, 可以正常踏住食嘛! |
波波隻腳仔都未好返, 已經有 10日喇, 我明白需要時間, 不過呢個仔好麻煩; 已經困籠要佢休息, 佢仲不停東抓西抓, 一日前明顯好轉, 開餐都無縮腳啦, 一日後就連poo poo都唔去喇, 轉唔到圈嘛😓!
都難免擔心, 到底下一步要點辦?
 |
| video |
湊老人家一定壓力大, 每個家長都一樣見招拆招, 挺住上馬, 阿女養咗貓貓後應該有不同感受, 原來養兒方知父母恩可以apply落毛孩😊, 明顯覺得佢對我嘅緊張更理解, 對兩隻豬嘅關心層面更大!
可能佢覺得我壓力大, 一口氣買咗3張松松地墊比我, 知道我最鍾意呢D禮物, 多過一隻鑽戒😜!
好感恩老公同阿女都明白, 亦好支持我對兩隻豬嘅醫療決策, 雖然有時感覺係好挫敗, 但我仍可以挺住繼續行!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
