波波琴日都仲係將腳仔吊起, 見佢用3隻腳企好心痛, 行兩步又跌跌碰碰, 已經睇唔到盲舂舂, 點解仲要佢腳仔痛? 還好我都祇係肉赤佢受苦, 無擔心到瞓唔到, 因為我深信比多D時間佢一定會康復🙌!
朋友知道波波腳仔痛, 叫我比呢款關節supplement佢服用, 佢話雖然都係葡萄糖胺軟骨素, 但效果好好, 上次佢狗狗吊腳, 食咗幾日就好, 反正唔係藥, 無妨一試睇吓幫唔幫到!
衹要係安全方法, 我唔抗拒去做, 即刻聯絡網店朋友, 問問最快幾時可以送到; 一開始約好星期一, 然後我send咗波波吊腳相片比佢, 佢即刻覆, 話慘慘豬佢見到都心痛, 會特別安排即日送到, 知道我好等用！
好感恩好感恩又一次祇係買賣交易, 店家會為我諗, 呢種看待有如朋友, 更奉上關心與祝福🙏!
我好有呢種運, 有好幾個店主都係開始買嘢後, 慢慢變咗朋友, 而呢種朋友又最肯幫人!
其實琴日見波波仲縮起腳仔, 我有諗過要唔要見醫生, 但阿女同老公都話唔覺好嚴重, 波波似係比自己記憶操縱, 只要佢一諗到呢隻腳係會痛, 佢即縮!
咁我都有考慮見醫生, 但見醫生又有咩會做? 照xray應該都唔會做得到, 佢眼仔無咗視力後更難掌控, 當然唔想照張片用鎮定劑咁嚴重; 我怕好心做壞事, 拉扯之間傷得更重, 又怕嚇到佢脷黑心臟停頓; 唔考慮用西藥, 唔考慮做手術, 見醫生根本無用!
自己觀察佢真係比之前好, 當然唔排除佢用力踏步仍有痛, 所以大小便轉圈後佢腳仔一定縮; 我有信心佢一定會慢慢好, 繼續用針灸筆, 順勢藥, 紅外缐再加上補充品一定有用, 祇係見到佢咁陰功我肉痛!
琴晚拎咗隻關節supplement即服用, 今日明顯見佢有好轉, 咁唔排除休息多咗有幫助, 佢今早一直可以用四隻腳仔踏步, 直到poo poo轉圈後又再縮, 應該係佢用力就會痛!
幾日間應該未夠時間康復, 但感覺佢有進步, 嚴格困籠休息一定要做, 間中上大床安撫吓就好!
點會一世風平浪靜咁好, 無端端都會扯到, 不過小毛病好難避到, 小風浪有空間幫到就好好!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
