 |
| 相片連結 |
琴日寵物展, 考慮有無去行吓嘅需要, 因為我無買嘢嘅打算; 寵物展最常見係推廣狗糧, 我D豬仔都無食乾糧好多年, 又唔敢亂試保健品, 因為依家好關注成份, 要保証同佢哋食緊嘅藥無抗衡, 匆匆忙忙咁我好難仔細做搜尋!
零食嘛...往年買嘅都祇係食咗一兩粒, 我同自己講, 就算去都唔會喺零食方面再動腦筋!
兩隻豬仔健康各有唔同問題, 我要小心護住佢哋肝腎, 所以選零食格外留神, 唔敢買高蛋白質, 即係肉粒免問; 上年寵物展為佢哋精心挑選嘅餅仔, 佢哋又唔吼, 都係勉強比面食咗一兩粒😒!
 |
| 阿女嘅貓貓想同達達做朋友? |
最後都係決定去行一round, 咁啱約咗阿女落銅鑼灣, 地鐵都係坐多一個站, 都睇吓有無嘢啱阿女嘅貓貓!
今日會場唔大, 一吓就行晒, 見唔到有咩啱; 我哋正打算離開, 好巧合遇到朋友, 傾談兩句稍作停留, 偶然望到朋友背後, 店家正介紹緊'軟'肉粒...好吸引!
近來我想法有D改變, 唔想事事揸得太緊, 唔係話唔小心, 但首要我希望佢哋開心; 依家佢哋仍有興趣食肉粒, 我就放鬆少少滿足佢哋要求!
明白有朝一日, 呢個都未必會再有興趣放入口...
其實要搵啱佢哋口感嘅肉肉唔容易, 呢兩隻係無牙豬, 肉質太硬怕將牙肉磨損, 要佢哋費勁去咬一定唔要; 聽到呢隻係軟身脫水肉肉, 點忍得住唔買少少！
呢個係機緣, 唔係遇到朋友根本唔會停留喺呢個booth前面, 可能係個天指引, 話我聽今次有滿足吓兩隻豬仔口慾嘅必要!
今次真係無買錯, 兩隻豬食得好開心, 達達真係好少咁興奮, 會追住我腳跟😁!
將尺度稍放寬, 見佢哋食得開心, 有生氣有追逐, 我好享受呢種氣氛; 大原則仍會揸緊, 但唔想太 panic做人, 亦唔想剝奪晒佢哋嘅享受, 生命苦短, 唔想認真得過份, 最重要係開心!
日常生活乏善可陳, 最開心係我食嘢時, 兩隻豬會行近過來餐檯等, 呢個壞習慣, 今日我見到就最開心！
別無所求, 但願生活安穩, 無間斷同兩隻豬仔日常保養住, 但願每日都可以過得安心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
