波波已經有兩日無縮起腳仔, 但我都係困籠等佢休息, 因為阿女又出咗差, 我又要幫佢餵貓貓, 避唔到要出去, 困住安全D; 以為困籠萬無一失, 唔會點衰啦!
今日中午我從外面返屋企, 一打開大門😱, 我已經知死, 見到姐姐放波波去廁板尿尿, 個仔如常舉腳, 但我見佢係用隻痛腳支撐住身體, 佢無痛就唔記得要就住, 咁就死啦!
睇住佢屙完跌低, 我跑過去想幫都趕唔住, 然後抱起佢, 就見佢又縮腳透晒大氣😰!
無怪責姐姐, 其實佢識抱波波出籠VV已經係有關注, 點要求佢會留心波波傷邊隻腳仔, 除咗媽媽會咁細心睇住, 邊個會咁留意?
望住個仔感覺好氣餒, 辛苦咗一星期, 努力咁做治療付之一炬, 又要心痛佢再痛耐D!
都係自己嘅疏忽, 無交帶清楚累事, 今次姐姐親眼見到波波又縮腳, 都好似有D唔好意思; 唯有同佢講, 萬一以後見波波舉腳要幫幫佢, 比D力去傍住, 個仔未完全痊癒, 再傷真係無了期!
任我點計劃週詳, 點小心部署, 都有百密一疏, 意外就係吼你唔為意; 注定要波波再痛痛, 其實我心痛到死, 阿女仲未返, 我仲要一日出去幾次😓!
幫波波鋪好塊隔尿墊, 寧願佢就地解決, 不過呢個仔唔係爛竇豬, 正常應該都唔會痾落墊處; 叫姐姐唔使再抱佢去VV, 都係等我自己湊佢!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
 |
| 新增說明文字 |
