 |
| 相片連結 |
仍然好忙, 皆因阿女出差, 要幫佢照顧貓貓; 雖然係忙, 但忙得心情愉快, 因為兩隻豬仔身體幾好狀態😄!
無容置疑我心情起落全比呢兩隻豬仔操控晒, 雖然明白年紀越來越老, 預咗見到健康會慢慢退步, 但希望盡力照顧好, 將好時光延續😅!
達達用咗CBD oil近三個月, 呢段期間都配合住用順勢療法, 算係將手腳抽筋情況控制住喇, 近呢個月都無再病發; 希望真係如開初搜尋嘅資料, 用大麻籽油抗病, 要見到成效一般要等4個月, 加上最近我加咗一隻新配方順勢藥, 可能click中關鍵, 見到個刁蠻女無再縮起手腳嗯嗯叫, 我開心過中馬票, 不過佢嘅乞嚏同鼻水, 就點都搞唔掂😣!
呢排落咗幾場雨, 氣溫降低咗少少, 捉緊機會, 同兩隻豬坐車仔出去兜一轉; 要去餵貓B時, 又帶同佢哋一齊, 等佢哋同貓貓見吓面; 已經好耐無出去, 兩隻豬仔快悶到癲, 出去見到佢哋明顯開心, 笑容滿面!
有話人㚒人緣, 動物都可能一樣對選擇朋友有自己意見, 兩隻豬仔對貓B份外友善, 緊張大少同刁蠻公主都有好好表現, 可以咁平和相處以前少見😄！
小動物真可愛, 係最好嘅心靈雞湯, 難怪咁多同路人願意為寶貝們赴湯渡火, 在所不惜, 無養毛孩嘅朋友真係好難明😁!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
