 |
| 相片連結 |
近來波波又行得頗差, 早前已經好得七七八八, 突然瞓醒又腳仔無晒力, 行到跌吓跌吓, 反反覆覆好大偏差!
一定唔會考慮入侵性治療, 之前有做過針灸, 但樊醫生又話佢唔夾, 太緊張猛扯氣效果一定差, 以前尚且如此, 依家失去視力, 負面反應一定更大!
唔敢貿然帶佢照xray確診啦, 自己個仔表現我好瞭解, 反抗係必然我清楚晒, 唔想用鎮靜藥對腎仔傷害大, 強行拉扯又怕甩跤, 更唔想比佢壓力過大, 負荷爆棚情況會更壞...
但...唔可以由得佢越來越差, 差到唔識行先來諗辦法就太遲喇!
都屬意搵專業物理治療師, 做正統嘅物理治療去幫佢, 靠自己幫助有限, 自己做嘅只可以係輔助性, 有多少少幫助空間!
我遭遇好奇怪, 曾經做過嘅兩個上門治療都無得後續, 林醫生同物理治療師都相繼自己開業, 唔再做上門喇; 佢哋更上一層樓當然係好事, 衷心祝賀佢哋越做發展越大; 但兩個醫護診所對我來講都路途遙遠, 要帶住波波求診太難!
唯有另覓治療師, 今次會幫波波嘅治療師係畢業於英國International Association of Animal Therapists, 但要帶波波去診所, 無得上門做喇; 咁診所設施相對較好, 聽聞laser therapy幫助好大, 是否適合就要靠治療師見過波波後做評估, 都要希望波波夾得到啦!
約咗星期五去診所, 先見治療師做評估, 定下療程要點做, 第一round要做幾多次療程最好; 咁我明白做呢種療程三兩次無好大作用, 但大前題係個仔肯比人做啦!
適當時間出去見吓陽光, 吹吹風對大家都好, 無謂愁眉不展終日煩惱, 任何事勇敢面對積極搵出路; 要記住樂觀會反射比兩隻豬, 影響佢哋身體健康轉好!
寵物展當日, 聽林醫生講座, 佢話主人先要放輕鬆, 好多時做咗應有嘅治療, 病情可能都改變唔到, 比自己太大壓力唔好; 佢話望吓鏡中嘅自己, 有無愁眉深鎖? 有無肩膊肌肉硬到似石膏?
我明白佢意思係叫釋放自己順應天命, 唔好勉強逆天而行!
我何止肌肉肩膊硬, 膏肓炎嗰種係錐住嘅痛, 好難頂啦; 不過依家都好得七七八八, 真係要學習放鬆喇!
唔想困死自己, 要抽空出外透吓氣, 太多負能量會影響埋兩隻豬, 唔再為改變唔到嘅事實太執意!
自己係明白慢性病唔會痊癒, 何必執著於要一個靚嘅化驗數字? 檢查再多又有無意思?
反正需要做嘅我唔會停住, 不如睇住兩隻豬嘅表現, 由佢哋表達比我知啦!
例如今次波波腳仔又有事, 佢嘅表現就係叫我要去搵治療師啦!
今日同阿女結伴去睇戲, 咁啱老公放假, 有老公睇住兩隻豬, 都可以quit幾個鐘竄出去!
我有興趣嘅都一定係有關狗狗嘅電影😊, 呢套戲叫「貝拉400哩的約定」,大概講述主人因為迫於無奈嘅原因, 將貝拉寄養於朋友家中暫住, 但貝拉不明所以, 心中想念屋企, 伺機逃走, 千辛萬苦踏上400哩尋親嘅旅程!
的確, 狗狗認定你係佢唯一, 相守嘅決心無嘢可阻擋住, 誓要同主人一世相依!
一套減壓嘅電影, 結局完美!
最後, 想同大家分享FB群組上, 有一段貓媽媽嘅留言, 非常勵志, 令我覺醒; 希望佢唔會介意我嘅分享, 佢原意都係想同家中有病患者互勉之!
原文連結: by Amelia Wu
節錄幾小段重點落嚟:
末期腎衰竭，,根據大部分人的說法，是絕症，很多人甚至叫我不要抱有希望，又說叫我珍惜每一天，日子在倒數之類的說話。可能本是好意關心，但其實卻帶有負能量。
醫生的責任，一定要跟我們交待最壞情況，而往往就是這種恐懼，打亂了我們思維。任何一個醫生也好，專業人士也好，說的話本應就不應該不經過濾就盡信。
對我來說更重要的，是如何照顧孩子，及盡量讓牠身心在許可的情況下達到至少是不錯的水平。經過我考慮之後，我沒有給他吃過西藥，甚至是當時醫生希望幫助牠增加胃口的開胃藥，也沒有聽取很多人叫我幫他立即開始打皮下水的意見。因為我了解我的孩子，這些無日無之的動作，會令他很憂鬱。
沒有最好的方法，只有最適合自己孩子的方法。結果，兩個月之後的覆診，腎指數由四期跌至三期尾；而再過兩個月，由三期尾跌至三期中。我不是，也絕對沒有沾沾自喜，畢竟，腎衰竭不會痊癒。但我為孩子仍然擁有一定的生活質素而高興 。
這段時間，我心裡不停出現著”平衡”兩個字，我就是想在治療和孩子的心情作出一個平衡。對他好的事，盡做，但不要令他太大壓力。不應該吃的食物如零食，很偶爾我也是會給。那些一刀切，甚麼也限制的方法，不適合我，也不適合我的孩子。
時間從來不比質素重要，若然孩子離開前那天還能擁有一段時間的優質生活，無憾了。
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
