我一向都有比兩隻豬仔食關節補充品, 但有無實質幫助我都真係有疑問, 係caregiver placebo effect? 總之有食就當有保護, 食咗較安心!
波波以往一直行動敏捷, 根本唔使我擔心, 達達就咁多年右後腳都會有時腳震震, 多年前去Dr. S度做過針灸, 對於腳震呢方面全無幫助, 再見過骨科權威Dr. Tint, 就話佢應該好細個就有關節移位, 係緣於不良基因, 達達已經習慣識自己就力行, 祇要佢唔跳就唔使擔心; 咁多年來我又真係從未見過達達跳, 既然佢咁叻女識就住, 對佢行動又無防礙, 咁我衹係正常咁keep住, 每日比佢哋補充適量關節supplement!
一直習慣隔一段時間會換吓不同品牌, 唔想食同一配方成為習慣, 俗語講嘅食'純'咗就幫助唔大, 但換來換去都偏向選擇天然成份; 咁多年來都換過唔少品牌, 但無留意成效, 無問題出現其實要知道效果真係好難!
一直著重睇成份, 無特別留意質感, 不過曾經買過紐西蘭一隻關節supplement, 見到網上全都係正面評價, 朋友狗狗用後亦大讃有幫助, 可惜兩隻豬都唔肯吞 😞!
佢哋唔鍾意嗰種口感, 粒丸仔嘅質地又好韌, 無可能壓碎混和食物, 產品再好佢哋唔接受等如廢物啦, 從此又多一樣嘢要留心😅!
過往波波行動自如, 達達都一直maintained住, 食邊款都唔礙事, A款唔鍾意就食B款, 我唔需要太費神!
但今次波波出現膝關節移位問題, 我對關節補充品就特別上心, 今次唔同以往祇係日常補健, 係針對性有特別需求!
其實明白關節移位係結構性問題, 最好係動手術, 但波波年紀唔細, 又有蛋白尿, 氣管問題亦要特別留心; 麻醉有一定風險, 就算幸運過渡, 麻醉藥對佢已經功能不全嘅腎臟, 後遺症又有幾深? 咁大嘅賭博我點會唔擔心, 諗都唔敢諗!
都係盡量喺周邊幫忙, 做到嘅盡做, 希望夾到一隻保健品可以比佢骨與骨之間多D滋潤, 減少磨擦帶來嘅疼痛已經係萬幸!
用過喺獸醫界非常popular嘅品牌, 可惜對波波幫助唔大, 因為有症狀, 會容易分辨到效用, 唔見有改善祇好從新再搜尋!
突然, 記起之前分享過'犬退化性關節炎'嗰篇文章, 有提過Antinol呢隻關節補充品, 即刻集中精神去瞭解, 波波是否適合!
睇咗好多feedback同主人分享嘅短片, 其中一段片狗狗係膝關節移位, 食後幫助好大, 亦見有松松群組都推薦呢個產品; 今次我除咗關注成份, 對產品形狀大細都有留心喇, 呢個產品係小型軟gel capsule, 就算波波唔識吞, 建議可唧出來混和食物, 評語話適口性都高👍, 咁就唔使擔心啦!
呢隻補充品會唔會幫到波波? 立即emailed比藥廠, 問問波波有蛋白尿腎功能唔好, 可會合用?
其實都睇過台灣腎貓群組, 醫生有建議可用, 不過再小心D問清楚確保安全更穩陣啦!
然後收到Dr. Achinee嘅回覆, 獸醫有應用Antinol治療各種炎症, 包括CKD嘅抗炎症, 對腎臟或肝臟無不良影響, 咁我當然立刻開始訂購行動!!!
今日收到呢個產品喇, 但願會幫到波波, 當然都明白膝關節移位呢個情況, 唔做手術就最重要幫佢build up肌肉, 呢樣已經付諸行動; 但我希望可以減少佢感覺唔舒服, 先可以有更大空間求進步!
希望往後嘅日子, 波B可以再行得開開心心, 唔使每踏一步都要就住就住咁就好!
Link: Antinol®安適得®是什麼？
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
