阿女今日回港, 返來食晚飯時去廁所, 然後打開門輕聲叫我, 我問乜事? 佢就對我招手, 嚇我一驚以為佢身體有唔妥!
點知佢指住個窗叫我望, 我就見到有隻飛蛾, 我衝口而出大叫豆b, 你咁乖女真係返來探我!
阿女話清明前後, 係咪真係會返來, 問我點知佢係豆b? 唔係其他狗狗返來探我!
我好肯定答, 一定係豆b, 佢一向習慣陪我入廁所, 剛好前幾晚我深夜如廁後, 突然對佢好掛念, 仲坐咗出廳抱住佢個咕𠱸, 貼住面同佢講, 媽媽好掛住佢, 可唔可以返來探吓我!
今晚望住窗外小小一隻飛蛾, 我手臂嘅毛管突然戙起晒, 我望住佢唔敢開窗, 怕佢會飛走咗, 但又想開窗比佢返來啊; 但當我一有呢個念頭, 佢就即刻唔見咗😖!
我知呢隻小小飛蛾一定係豆b, 無耐前同阿女傾談間, 無啦啦莫明其妙話題又扯到佢身上!
我哋講起豆b性格嘅轉變, 從剛剛跟我時嘅禮讓(其實佢可能未適應, 亦好聰明要先觀察吓情況😆), 到後來變得主動, 慢慢學識爭寵...
記起從前我會拍手, 張開雙臂叫波波過來, 豆b唔理係咪叫佢, 一定會搶先, 光速咁跑來衝到我前面, 要同細佬勁賽快佢一線!
阿女話佢好直接, 性格單純光明磊落, 想要咪要囉, 唔會扭扭捏捏😊!
今晚, 又好掛住豬豆, 佢已經離開咗我兩年半, 但每諗起佢嘅形象都恍如作天, 點可能已經無抱過佢快三年?
以往每次想起佢都會鼻酸, 唯獨今晚, 我一路想一路嘴角帶笑!
再次攬實個抱枕閉目回想, 就好似返到從前...
豆b, 無論我哋相隔幾遙遠, 媽媽對你嘅愛就越來越濃烈😍😘😙?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
