自從有咗internet, 上網搜尋資料極容易, 好處係增進好多知識, 但亦有弊處!
每個人都可以分享個人經驗上互聯網, 用得著嘅當然係有所得益, 某D無傷大雅嘅分享, 試吓都可以, 就算無得到網上所講嘅預期效果, 最多咪講句"徙鬼氣"!
但對於健康相關問題, 最好小心D, 我諗分享資訊嘅人唔會有惡意, 祇係想分享自己成功嘅例子, 比有相關難題嘅朋友做個參考, 係一番好意!
有時又真係有一言驚醒嘅意義, 以我自己為例, 無見到呢D分享根本唔知有咁好嘅產品, 真係要講句好人好事, 但大家取料之餘, 要切記唔好"好心做壞事"!
我都不停上網搵資料去幫我嘅豬, 網上真係有好多五花八門嘅資訊係自己未曾留意, 亦有好多醫療資訊, 特殊飲食餐單, 保健品等等嘅分享, 如果大家無盲目跟住去做, 會自己再做 research嘅, 有所得益絕對係好事, 但重要係要明白每個動物嘅身體唔同, 啱我未必啱你; 知道有呢D做法, 產品等等, 一定要自己再做多D, 仔細研究清楚, 人哋用咗好效果, 但唔適合就可能毒害咗自己....
當我幾隻豬仔年輕力壯時, 我係比較輕鬆, 用嘅保健品都好普通, 唔會點出事, 但相對佢哋年紀漸大, 我就會比以前留意, 用錯咗唔止係無用, 怕傷害咗健康我都唔知, 到今時今日兩隻豬有慢性病, 保健品我更唔敢亂咁試!
一般我會問問豬仔嘅獸醫, 如果醫生唔清楚呢隻保健品, 我會直接emailed比製造商, 問問豬仔嘅病歷背境是否合用; 一般製做保健品嘅都有醫生做顧問, 佢哋都會回信!
但咁做都未係100%安全, 因為未食落肚反應係睇唔到, 有無異狀都要留意住!
今日寫呢篇, 係睇到網上有狗狗因為轉鮮食而誘發胰臟炎, 最後走上不歸路; 當然我唔係當事人, 亦對事主唔認識, 唔清楚內裡原因, 睇短短嘅留言唔可以做任何評論, 祇係睇到網上淚的控訴, 有感於有時行錯一步, 就鑄成大錯無回頭路!
我都有朋友狗狗轉raw diet後效果好好, 對寶貝健康好配合, 見我講及達達挑食又食得唔好, 都建議我不妨試試!
但我邊敢輕舉妄動啊, 兩隻豬食homemade diet 已有 8年幾時間, 腸胃已經適應晒, 或者轉糧真係對佢哋健康有改善, 但邊個敢擔保? 萬一兩隻高齡豬仔唔夾, 我就死定喇, 我邊敢博呀!
有時好小事, 借D意就會引發好大麻煩, 豬仔年紀大喇, 都係小心D啦, 最驚做錯咗無改正嘅空間...
無人會比你更清楚自己嘅毛孩, 無嘢係最好, 祇視乎是否適合, 再好嘅產品唔適合就係廢物, 不厭其煩再講都係呢句, 寶貝嘅一切全賴你為佢哋把關，祇有你最清楚你嘅毛孩!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
