 |
| 依家由我達達公主陪媽媽瞓覺 |
答應咗乖仔要收拾心情, 唔好整日沉浸喺過度悲傷中, 雖然波波嘅離開確實喺我心中鑿咗一個不能填補嘅大洞, 日常生活又有太多避免唔到嘅觸碰, 但我會努力調整好, 唔會將傷感縱容!
琴晚係呢年多來瞓得最好嘅一晚, 12點前上床, 因為老公今日放假, 可以幫我服侍達達早餐, 佢叫我放心瞓個好覺, 結果一瞓就瞓到10點幾, 好奢侈嘅長時間!
我一定要調整好心態, 可以懷念我嘅波B, 但唔可以再傷感放不下, 咁佢會唔放心媽媽, 阻礙咗佢放心向前行; 如果傷心可以換佢返來, 我一定會放縱自己傷心, 但既成事實亦無力挽回, 我就要為寶貝諗吓!
我希望佢好, 尤其無媽媽照顧嘅時間, 更希望佢可以獨立, 如果再要分神擔心媽媽, 我就係加重佢負擔; 阿女都同我講, 祇要我好, 波波一定好, 所以…波波, 你可以放心走喇, 媽媽一定會好好過活, 亦會照顧好達達!
 |
| 從細到大形影不離嘅波波 |
剛睇到呢句,「最美的事不是留住時光, 是留住記憶」, 我會記住我同波波相處嘅每一個時刻, 我哋獨有嘅感覺, 過去有乖仔在旁嘅每個點滴, 都係我人生最美麗嘅故事, 一段最美好嘅時光!
可能氣氛轉換咗, 達豬心情都好咗, 不過胃口都係差, 呢年來都係上上落落, 已經唔識擔心, 擔心亦無幫助, 只可以睇住情況盡量做好吧!
PS. 今日係安安離開嘅10週年, 一轉眼就10年時間真過得快, 但回憶仍歷久彌新, 安安都從未曾離開仍深藏喺我腦海!
安安, 媽媽拜託你照顧波波, 就好似當年你對佢咁友愛, 媽媽相信你會做好, 希望你哋7個小鬼頭在天家活得快樂, 互助互愛!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
