今日係公眾假期, 應該會比平日多狗狗散步; 工人姐姐又放咗假,我都唔敢一個人帶佢哋落街行喇, 有D心理陰影, 如果, 萬一再遇到D唔拖繩嘅大狗, 都唔知點算, 都係落平台遊下車河算喇!
講起無拖繩嘅大狗, 其實我覺得自己都唔係全無進步, 琴日出外食完晚飯番屋企時, 都遇到隻無拖繩嘅流浪狗, 可能係附近地盤嘅狗狗, 佢有頸帶嘅; 佢都有行埋嚟我身邊, 不過佢好平靜, 我就唔係咁驚啦; 但嗰日隻雪橇, 好似旋風咁衝埋嚟, 好具挑釁性, 我就真係克服唔到嗰種由心震到出嚟嘅懼意, 仲要帶住班豬仔, 又多咗重憂慮; 波波一見狗哋就吠, 萬一挑起隻大狗有攻擊行為, 我真係無能力保護到佢哋嘛, 唯有避得過就避啦!
今日天氣有D悶熱, 好彩都有D風, 因為假期平台多咗人出入, 唔方便放3隻豬仔落地行行喇, 不過佢哋有街街去都好開心啦, 同佢哋睇下魚魚, 兩頭行咗一陣, 就要番歸準備佢哋嘅晚餐喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
