近日真係忙, 年近歲晚點都多D嘢做, 就算自己唔蒸糕都要抽時間出去買番幾底糕嘛; 仲有要家居清潔, 除舊迎新, 買咗幾件小家電, 有D煥然一新感 :)
最最開心係幫3隻豬做咗靚靚揮春啊!
忙就肯定係較以前忙, 但心情唔錯, 無工人姐姐幫手係辛苦咗, 但又真係少咗好多激氣, 心情平靜好多; 但願遲吓新姐姐會幫到我, 又唔會要我咁激氣就好囉!
雖然要做家務, 但對3隻豬仍照顧週到, 只係簡單照紅外線, 就要花費個半鐘; 本來呢個治療唔使手動, 好似陪喺佢哋身邊係無必要, 但其實我要不時就住角度去調節, 最重要係唔可以比佢哋個頭仔擰轉, 比雙眼仔接觸光源令眼睛受損!
早兩日喺FB上posted 咗3隻豬嘅相片, 同大家分享佢哋做物理治療; 波波照燈好乖好合作, 達達最易話為, 照住燈會好快瞓著; 到豆b呢隻麻煩豬仔, 就巴巴閉閉; 呢隻豬要佢坐定真係好難, 還好佢為食, 用零食控制住都叫做肯坐低!
有網友慨嘆做好媽媽唔易為, 其實做呢D真係無所謂, 只係花上時間勞力, 比較起佢哋身體有唔舒服, 果種擔心折磨先係最慘淒!
每次佢哋身體有問題, 都嚇到我失魂兼心痛到夭心夭肺!
我但願未來十年仲可以繼續服侍3隻寶貝豬仔, 只要佢哋身體健康, 我再忙再辛苦都無問題!
希望3隻豬身體安康, 我又八八卦卦買咗吉祥飾物, 喺新年頭等佢哋齊齊配戴, 好意頭要頭威頭勢 ;)
仲有仲有...羊年梗唔會少羊仔裝飾品啦, 買左塊日本羊仔花布, 幫佢哋做左3個圍巾!
雖然係忙到七彩, 但忙裡偷閒為3隻寶貝做小手功, 心情實在愉快!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
