果真係福無重至, 禍不單行?
雖然我遇到嘅唔可以稱得上係"禍"咁大件事, 但就煩死囉!
依家要請個工人好唔容易, 實在求過於供, 工人要揀工無可厚非, 鬼都想搵份工係無僱主監視; 幾經困難總算叫做有熟人介紹, 搵到個oversea, 碰巧佢來港旅遊, 應該都係主要搵僱主; 大家見過面傾談過都算係唔錯, 所謂唔錯只係比全未見過面, 隔山買牛較保險囉; 一切手續辦妥, 就諗住好快過渡呢段無工人嘅日子!
從工人姐姐離開已經捱咗廿日, 距離終點越嚟越近,雖然每日都好忙好攰, 但有期望好快捱過!
但…我真係無工人運, 晴天霹靂等咗廿幾日, 突然收到agent嘅通知, 工人姐姐驗身後健康有問題, 竟然係乙肝帶菌, 即係body check係唔合格喎; 由於呢個姐姐係direct hire, 無得換, 我只可以選擇要、唔要佢!
當然我仍可堅持請佢返嚟, 但乙型肝炎係可以經血液口水傳染, 每日住同一屋簷, 咁多接觸, 可免則免啦!
天呀又再原地踏歩, 又浪費咗時間金錢, 好黑仔呀!
真係如洩咗氣嘅氣球, 點解要咁玩我?!
OK, 無問題, 就從頭嚟過, 呢D唔係健康問題, 我挺得過！
呢頭已經煩到嘔泡, 今朝一起身就見波波又有事, 見佢條氣chok住chok住, 呼吸唔妥; 已經即時餵佢順勢藥, 但唔work; 見佢呼吸有D "hehe"聲, 無晒心機呢樣就真係攞我命囉!
我唔想比佢食氣管藥, 波波對西藥好敏感, 非必要我都係唔想!
一直到食完晚餐, 都無好轉, 總係挨年近晚, 最忙最煩就最多事, 點辦?
突然諗起slippery elm, 係可以降低肺同支氣管黏液嘅黏度, 增加其流動性, 可以治療咳嗽喎; 上次波波腸胃唔妥, 食咗佢無意中連氣管都醫好咗, 咁不防一試喎!
好幸運波波食咗呢隻草本後, 好番好多, 條氣順咗, 無再chok氣得咁密囉!
小心監察住隻豬, 希望早沾勿藥!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
