琴晚都瞓得唔好, 始終掛住個仔, 唔敢熟睡, 一直都keep住半睡半醒狀態, 一聽見有異常嘅聲嚮就彈起嚟!
想當年叻叻有病, 我又係唔敢瞓覺, 當年仲要返工, 簡直頻臨崩潰狀態; 當日頂到無得頂, 又怕太攰瞓到唔識醒, 於是諗到喺叻叻嘅床仔掛幾個響鈴, 萬一我不自覺進入咗昏睡狀態, 佢一郁動時我聽到響聲就會醒; 估唔到依家養呢幾隻豬一樣咁苦命!
其實係唔應該怨命, 性格係天生成, 任我叫自己幾放鬆, 幾努力調節, 都不得不認命, 當D豬仔有事就完全顯露番真我本性; 我知咁緊張係唔好, 要嚟嘅緊張都幫唔到, 但呢個係宿命!
我只可以講我唔適合再養小動物, 太動情, 分分鐘佢哋未死我已經嚇到無命!
今朝一早又自己攞嚟驚, 話說每朝餵早餐前, 都叫3隻豬仔先去尿尿, 今早波波入咗廁所, 但好快走番出嚟, 去望吓塊尿片, 無濕喎!
再叫波波去屙, 我望住佢舉腳、轉圈, 做晒平時佢要VV嘅程序, 但都係無尿尿喎 :(
個心即刻一沉, 個腦開始亂諗, 準備夠鐘診所一開診就book 醫生!
強作鎮定, 如常開早餐, 3隻豬都好快食晒, 當然我集中點係放喺波波身上啦, 見隻豬仔食完餐, 行兩步又坐下, 渾身唔舒服咁, 死喇!
早上8點幾咋, 獸醫診所邊有咁早開吖, 唯有搵D嘢做吓!
其實感覺上波波係有好咗㗎, 無再作嘔, 亦無咗琴晚夜氣管嗰種卡卡聲啦, 都唔知要點做先好, 唯有抱住佢再聞氣啦!
一個鐘後, 叫波波再去尿尿, 好開心, 佢有屙到喇 :D
呢個時候個心定晒, 慢慢諗究竟點解, 先諗到琴晚半夜我瞓唔好, 見D豬都醒埋, 就放咗佢哋出去尿尿嘛!
其實達達同豆b今早都無尿尿, 但因為波波有開問題, 仲要呢隻衰豬仔知道要尿尿完先有得食早餐, 佢又舉脚又入廁所, 交足戲比我嘛!
如果呢隻豬無做呢一連串尿尿嘅動作, 我會無咁驚, 可能立刻諗到係咩問題, 最衰呢隻豬太聰明, 古靈精怪, 誤導咗我以為佢想屙但屙唔到嘛!
仲有- 佢渾身唔舒服, 行兩步就坐低, 係因為件衫, 琴日我見佢唔妥幫佢著咗件薄衫!
即刻同佢除番, 一天光晒!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
