 |
| 相片連結 |
今年( 應該係講舊年年尾喇:p )真係忙, 完全騰唔到時間行花市, 往年會同老公一齊去花墟行吓, 買吓年花, 今年諗都無諗過會出去行喇; 年三十晚老公放工時到維園匆匆買咗盆水仙花, 叫做人有我有啦, 今年呢盆水仙買得唔錯, 唔似往年要標到好高先開花, 我鍾意矮身D啦!
每年都會擺放呢種年花, 實在鍾意水仙嗰種清香, 比起百合果種俗鼻嘅香味好大分別啊!
都同3隻豬影番幾張相, 但就無大費週張喇, 太忙真係無mood做大龍鳳啦!
同3隻豬影相, 會見到達達嘅分別好大, 除咗肉眼見到毛毛變薄, 好明顯都見到佢情緒好差!
每次甩毛週期都一樣, 佢表情繃緊晒, 笑容欠奉啦; 當然有人會話狗狗嘅所謂笑, 伸長脷仔有好多因素, 話佢哋笑只係對號入坐啦; 但養呢D毛小孩嘅朋友一定分得清楚狗狗嘅喜怒哀樂, 佢哋同人類係無分別, 一樣會有情緒問題嘛!
達達明顯唔開心, 除咗情緒上嘅問題, 我覺得呢段期間佢身體健康都好大分別, 體力較差, 成日瞓覺!
如果循住老路行, 下個月應該進入更差嘅狀態, 然後到四月尾開始有好轉, 希望今次佢嘅毛毛都會生得返啦, Alopecia X就係無得估計嘅X檔案, 搵唔到原因無得問點解, 要發生就只好接受啦!
世界每日都發生住不同嘅X檔案, 而人力有限, 係無辦法一一破解, 經歷越多唔可以由自己控制嘅事例, 我由積極咁猛搵方法, 變到消極咁接受喇!
一切上天似有安排, 唔順勢而行真係好辛苦啊, 雖然心中仍有希望情況會得逆轉, 但同以往搭過山車嘅心情係有分別, 無揪心揪肺咁拉扯喇!
由積極變消極, 從猛搵方法去到逆來順受, 係好事定係壞?
呢段日子經歷咗太多事, 不容我唔改變睇法; 世界上嘅事係無公式, 亦太多X檔案無法解答, 人一生都在學習階段, 當然會經歷好多辛酸, 我要學習睇化!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
