 |
| 相片連結 |
有好幾日無update3隻豬仔嘅近況喇, 都係no news is good news 啦, 無風無浪平靜咁過, 就無咩好講喇!
達達豬嘅乞嚏症狀算係緩解, 無日以繼夜咁打到全身都震晒, 暫時算係穩定狀態!
至於佢甩毛情況, 就同之前走勢一樣, 越嚟越壞, 我已經好接受佢呢個循環, 再無好似以前咁歇斯底里咁想盡辦法!
當然要做嘅我會繼續去做, 亦一定會希望今次毛毛休眠期過後, 毛髮都會再生返!
人都係要經歷過, 先明白有好多嘢唔係努力就有成果, 所謂"人定勝天"? 好難!!
都係順勢而行, 做咗可做嘅就好喇, 點可能同上天談判吖!
波波氣管都比之前好咗, 依家用返順勢療法幫佢埋尾喇, 年近歲晚唔該3個皇帝千萬唔好咁多事, 要知道搵個醫生睇好難!
豆b暫時ok啦, 間歇都會聽到佢條氣唔順㗎, 咁就先比佢聞氣, 如果未能緩解, 就比佢食幾日順勢藥幫吓啦!
3隻豬當中兩個女較夾順勢療法, 通常好快見效, 波波就反應較差, 未必可以一click即中喇!
我自己就忙、忙、忙, 不停洗洗刷刷, 無工人姐姐幫手, 當然陪3隻豬都少咗時間, 但一D必要嘅護理程序就唔敢剔除, 尤期呢幾日天氣寒冷, 最容易引發筋骨疼痛啦; 為咗唔想3隻豬痛痛亦唔想嚇自己一餐, 物理治療仍要堅持繼續喇!
3隻豬好乖, 見我騰嚟騰去無時停, 佢哋會自己玩, 或者乖乖瞓覺 :)
呢排應該都唔會帶佢哋去街喇, 自己忙到唔識安排, 始終仲未習慣; 況且天氣寒冷都擔心冷親, 再要擔心埋呢樣我會好慘, 都係保險D留喺屋企算喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
