 |
| 相片連結 |
原來依家係零晨兩點幾, 不經不覺已經係年初一喇, 同大家拜個早年, 祝大家羊年平安、健康、開心、幸福、一切順利 :)
我諗年三十晚每個人都忙喇, 我更不在話下, 正常咁做家務已經分身不暇, 何況要準備賀年食品, 老公話要煮齋喎!
由我懂性以來, 年三十晚深夜媽媽就煮齋, 到踏入初一全家會食少少先去瞓覺, 婚後老公跟隨我家俗例, 佢都養成咗呢個習慣, 所以叫我煮齋!
往年有工人幫忙, 洗洗切切唔使勞動我嘛, 今年真係大件事, 材料咁多種類, 淨係事前準備已忙煞我啦!
由中午就開始準備, 又要餵飽3隻豬仔, 要做吓停吓喇!
今年真係無辦法為3隻豬仔做賀年食品, 唯有加餸食豐富D啦, 不過都係打算種類加添, 量就隨意加少少好喇, 唔可以咁放肆又好心做壞事㗎 :)
下午同老公一齊帶3隻豬去街街, 真係好耐無出去喇, 我好難自己一拖三, 要分開帶又無時間, 要我上上落落會好攰啦, 呢個非常時期真係有D困難!
同3隻豬換上新年衫, 想出去影吓過節相嘛, 有D擔心耐咗無出去波波情緒難控制, 今年自己做佈景嘅大project都未得閒 :p
出乎意料咁順利, 除咗出面有人過嚟逗佢哋玩, 個仔會緊張吠到反白眼, 其餘時間, 都算容易掌握, 尤其係達達, 好耐無笑得咁開心喇!
影完相又要趕住送佢哋返屋企喇, 今晚要出去食團年飯, 晚飯後返嚟整理吓D相片, 就要開始煮齋!
忙忙碌碌咁做一餐, 記得媽媽話過年要咁先有氣氛嘛, 等到一切告一段落, 坐低落嚟, 已經係年初一喇 :D
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
