今日母親節, 祝大家開開心心, 其實一個母親嘅快樂好簡單, 仔女身體健康, 已經係一個最快樂嘅母親喇!
琴晚又比波波嚇親, 見佢行得好慢後脚有D拖住咁, 唔通又扭親? 即刻比佢順勢療劑作舒緩, 然後要被困, 休息一定要充分, 已經有太多經驗同教訓, 依家我已經無咁騰🙂!
好幸運我有順勢療劑做back up, 唔嚴重嘅問題可以用作舒緩, 保得住唔會有更大嘅麻煩衍生!
今日隻豬仔已經行得正常返, 但我都係要佢被困, 呢隻豬仔暫時無事就乜都唔記得, 催開餐時用兩隻後脚企高都敢, 真係比佢激暈, 都係要比佢失自由, 一於要困!
達達應該好得七七八八喇, 從佢食嘢嘅速度最易暸解, 已經食得快, 食得晒😄!
不過都想佢多D休息, 放佢落網床陪波波一齊困一陣!
長遠計都係要build up肌肉去保護關節, 天氣唔好波波少咗出街, 就算出去都唔係好想放佢落地跑, 之前落過地個肚仔又紅晒, 攪咗一大餐😞!
上次帶達達見李醫生, 佢建議達達游水將後腿肌肉強化, 咁會行得較穩陣, 一早已經知道佢雙膝有關節移位, 但以前嘅醫生話佢從細都係咁, 佢有就住行嘅本能, 咁我就再無放上心喇!
可能時間耐咗, 情況比以前差咗啦, 感覺佢哋時好時壞; 之前波波做完Q touch 真係行到好似跑馬, 突然又脚仔痛喇!
達達都真係需要鍛鍊吓, 佢時不時脚震震都好差啦, 不過老師話佢暫使未適合游水, 咁遲D啦, 真係要的起心肝比佢哋運動吓, 喺水中運動會減壓, 唔怕有傷害變更差!
今個母親節, 我唔想出外, 留低兩隻豬我實在唔放心, 慶祝呢D都係講個心, 阿女所做嘅我已經好開心喇; 今日佢親手題字送上心意咭, 亦搵咗餐廳送外賣, 叫我一嘗呢間餐廳出名嘅醬燒豬肋骨😋; 每次佢食過好味嘅食品, 都無忘記我呢個母親, 我已經好感恩!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
