今日又帶波波見老師, 老師話波波好咗好多, 頭仔無脹住喇, 咁即係我加返順勢血壓療劑係做得啱啦; 至於對眼仔, 係兩隻眼都有視力, 咁當然有白內障會矇D啦, 我都知會係咁, 自己有近視唔戴眼鏡都矇查查嘛!
既然眼科話除咗手術係無得攪, 唯有自己諗辦法, 最怕因為白內障引起眼仔發炎就麻煩, 雖然眼科有開咗眼藥水比波波做預防, 但要長滴呢隻消炎藥我唔想喇, 除咗擔心會引起角膜變薄, 仲怕增加眼內壓, 到時惡化就真係唔摘眼都難!
將波波情況emailed順勢療師請教, 答覆係同意我唔用呢隻藥, 雖然係滴入眼, 都會被身體吸收嘛; 依家波波有蛋白尿, 最怕更傷腎就慘, 療師有建議我用邊種療劑做預防發炎保護雙眼.
然後再上自然療法網站, 搵吓資料點去幫波波對眼, 當然最想佢唔會因為白內障慢慢變盲啦.
好多好多feedback都話用N-acetyl-carnosine成份嘅眼藥水有幫助, 仲話除去白內障功效好大, 當然都需要相當時間; 形成白內障唔會係一朝一夕, 要除去都無可能轉瞬之間啦!
當然形成白內障嘅原因有好多, 白內障都有分類, 係天生定係年紀老化, 形成嘅位置等等都會影響用藥成效; 我唔敢奢望波波滴眼藥後會將情況逆轉, 但我盼望佢唔好快速變差, 最少....保得住唔會發炎要手術摘眼, 手術要麻醉, 呢個關我好難面對啊!
如果, 波波用藥後有好轉, 我當然極感恩, 就算無好轉, 可以拖慢失去視力嘅速度我都好甘願, 再卑微嘅希望, 睇唔到都唔好去到要手術除眼咁痛心啦!
呢個仔細細個就已經成日要見醫生, 密密血檢又要住院嚇到我暈, 戰戰兢兢咁將佢養大, 都算去到老大; 但願上天憐憫, 就比多幾年我哋過得開開心心啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
