今日比波波食處方中藥, 好緊張!
De有建議如果我擔心反應唔好, 初時可以減低份量, 如果無不適就慢慢逐日加適量, 直到服用到正常劑量, 因為唔跟指引嘅服用份量, 唔會得到預期效果咁理想, 咁我都明白呢個係正常!
但我一向緊張, 想當日初用順勢療劑, 心情完全一樣, 都係戰戰兢兢, 深怕食用過量, 又怕情況唔理想, 最擔心就係出現意外狀況啦!
今日用順勢療劑已經駕輕就熟, 唔會好似當初咁張惶😜!
每種藥物都有其效用, 亦有不足, 如果可以用不同藥物去互補不足係最理想, 不過就好難拿揑呢個準繩度, 所以我係好緊張!
今日午餐後比波波試少量, 其實都有擔心波波抗拒個味道, 我自己試過都真係…真正嘅苦口良藥😅; 不過波波又好ok, 好乖咁舔舔脷, 我都唔敢怠慢, 即刻餵佢飮少少暖水, 中和返D苦味, 怕佢㗳真覺得苦, 下次就會抗拒喇; 然後自己就金睛火眼𥄫住佢, 觀察住佢呼吸次數, 脷仔顏色, 還好一切都正常!
一個鐘後再餵多次, 加少許份量, 仍然無特別反應, 我已經無咁緊張, 今晚晚餐後會再餵多一次; 仍然base on測試劑量, 如果一切都正正常常, 聽日就再加少量!
我會循序漸進咁為波波加至正常份量, 希望今次中西合併咁用藥, 會帶出一個新局面, 效果理想, 波波身體會調理好, 得保健康!
衷心多謝大家嘅幫忙, 咁多位好朋友比意見, 為波波呢個衰鬼蛋白尿大費周章, 我希望波波可以用佢健康嘅身體報答大家, 不枉大家為佢搵料研究, emailed到藥廠, 張羅適合嘅藥方!
波波今次有玉兔招來好多貴人相助, 又有老虎仔保住健康, 一定福陞高照, 圓滿媽媽嘅期望!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
