 |
| 相片連結 |
唔使記住幾時幾候又要帶波波見醫生, 真係無咁大壓力, 早兩日同V傾電話, 佢話我把聲都唔同晒, 好輕快😊, 咁暫時算係有一個方向, 算搵到條路行, 希望唔使又急轉彎啦; 之前V幫我emailed比西草藥廠, 都有咗回覆, V知道我決定試中藥, 都比我support, 佢話總知幫到波波就好!
多謝V一向嘅關顧, 佢比嘅資料我會收藏好, 有兩手準備幾時都係好!
感覺波波都有同感, 呢排佢都表現得幾好, 行得好醒目, 自從佢睇唔到甚少踏出地墊之外, 對腳仔一接觸到磚地就停步; 今日佢同達達一齊兩頭行, 佢好自然行出地墊範圍, 亦無步步為營, 行得頗輕快, 連帶達達都叻女咗, 跟住波波轉彎, 行得好開心啦!
雖然波波無咗視力我好心痛, 但見到目前情況算穏定, 我已經知足; 希望波波用中藥後身體可以調理得較好, 就算眼仔睇唔到, 都可以保住基本生活質素!
今日中藥又再加添少量, 波波無不適接受得幾好, 我都比較放鬆; 一日兩次餐後一個鐘後服用, 網上話呢個時段吸收最好, 唔會反胃, 唔太飽又唔怕肚仔空空!
做得到嘅我一定照做, 希望收到效果更好!
達達早前去急診時驗血仍係肝酵素高, 以前從未有過咁嘅驗血報告, 我有懷疑係因為隻腦退化藥所影響, 已經即刻停服; 三隻豬都有相同血統, 雖然達達同波波唔同一胎, 都係同一條line出, 記得好似係同父異母, 所以體質應該都係同西藥夾唔到; 遲D再去驗多次血, 睇下停咗西藥後, 是否幫到肝酵素唔再高; 目前服用補肝supplement補一補, 希望adjust到啦!
時間真係過得好快, 捧在手心嘅寶貝一吓就變老, 每個生命都敵唔過時間嘅巨輪, 轉到老轉到開始多病痛; 老唔可怕, 但要活得舒服, 我可以做嘅一定為佢哋作守護; 就算佢哋老咗無曬牙仔, 面上多咗白毛, 唔再似年輕咁趣緻機靈, 眼仔又矇又睇唔到, 佢哋一樣係我最珍愛嘅寶寶, 我視佢哋如珠如寶, 直到終老!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
