早兩日網上睇到一篇貼文, 慨嘆照顧又老又病又唔識行嘅狗狗, 要揮開負能量好難; 再見到接二連三有狗狗離世, 尤其係喺跑道上一齊賽跑嘅狗狗, 睇住佢哋一隻隻倒下, 感覺好慘!
自己帶住心愛嘅狗狗, 不停往前跑, 見唔到終點, 更矛盾嘅係根本又唔想去到終點, 身心疲累只有硬撐...
如果曾經照料過重病狗狗嘅家長, 一定好瞭解, 嗰種心情起落無助, 要用言語表達好難, 所謂針唔到肉唔痛, 無呢種經歷實在好難明白, 邊個想愁雲慘霧咁過日? 邊個唔想開開心心會想喊?
我唔會忘記照顧叻叻嗰段日子, 全家都比憂傷籠罩, 初段擔心佢病發, 每日被無力感鞭撻; 一路落嚟, 誠惶誠恐擔驚受怕, 好怕做錯決定, 有些微變化都飽受驚嚇; 更怕面對生命倒數嘅日子, 將要同心愛話別, 嗰種日子超難捱😭!
經過嗰一段, 照顧狗狗心態有好大變化...
呢兩張FB上嘅cap圖, 完全將我心情講中曬!
可能你會覺得今日嘅我, 喺照顧狗狗方面有D吹毛求疵, 但你無我嘅經歷, 係唔會明白!
然後到豆b呢段一樣刻骨銘心, 亦有更多唔甘心唔忿, 本住過去嘅經驗我以為做得更好, 但終結都係厄運降臨; 撫心自問我照顧得好小心, 豆b確診後, 我一度對醫生嘅判斷唔接受, 佢點可能快步向死神?
明明精精神神, 又每年都驗身, 有咁嘅結果點可能?
每日不停搵另類療法, 幫助佢生活得舒服開心, 感恩小豆無捱大痛苦, 但幸運之神始終無降臨, 佢祇陪伴咗我多8個月, 衹可以推說係命運!
同豆b抗病打仗呢數個月, 又一次感受到網上所講嘅身心疲累, 唔知幾時到終點, 更怕終點在望嗰種痛心!
回望返彩虹橋上嘅6隻寶貝, 就係叻叻同豆b最揦心; 第一隻Bebe我仲未識擔心, 即使有心臟病咪帶佢見醫生, 定時食藥覆診, 控制住病情我好放心, 不過當年佢同叻叻一樣有抽筋, 抽筋實在好嚇人!
keep住食藥見醫生, 日子都過得平靜開心, 係到佢離開先知會咁傷心, 不停幻覺聽到佢頸帶繫住嘅鈴鐺聲, 好長嘅一段日子, 每有人問起都淚難禁, 畢竟係第一隻狗狗....
第二隻離開我嘅係叻叻, 叻叻嘛…嗰段經歷最痛心😭!
同叻叻一齊抗病一段長時間, 佢病情反覆要密密見醫生, 可悲係每次見醫生都有新嘅不幸, 一個一個新症狀產生, 醫到無藥可幫, 要叫我打針將佢送行....
我明白醫生建議嘅苦心, 已經再無前路, 所有嘅治療都唔可行!
我相信叻叻識讀心, 佢知道醫生提議將佢送行, 但我好記得當日佢望住我嘅眼神, 有依戀有傷心, 仲拼命抖起精神; 要我親手將眼仔仲亮晶晶嘅叻叻打針, 強行送佢離開真係無可能, 我選擇咗中醫中藥做寧養治療, 但求佢安然步向終點, 唔想後悔遺憾!
叻叻應該係心願未了, 佢一直乖乖合作食苦藥, 撐到阿女從美國暑假返嚟, 同阿女共渡咗三個鐘頭, 喺當日在我懷中平靜咁遠行!
叻叻心願已償, 終於等到見到阿女, 而媽媽抱住佢離開, 我諗佢走得好安心!
安安, 樂樂同精精嘅離開算係壽終正寢啦, 年紀老大當然會有病有痛, 但正常用藥可以克服, 亦無特別明顯痛苦, 三隻寶貝都可以活到15、6!
當然面對別離仍係心痛, 雪泥鴻爪印記會永遠藏於心中, 每一隻寶貝都係我心頭肉, 有如一副砌圖, 一片片拼貼於心中!
上天比我好大恩寵, 回望6隻寶貝去到臨終, 每一隻都無尖叫, 無表情痛苦扭曲, 呢個係我今生最大嘅福報!
一段貼文比我好大感觸, 尤其波波達達年事已高, 又咁多健康issue, 只望佢哋一樣可以行到最後都無痛苦, 我會竭盡所能去照顧, 祈求兩隻豬仔可以陪伴我行更遠嘅路🙏!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
