等咗兩星期, 終於等到寵健絡嘅P姐姐上門為波波做復健按摩, 波波一貫係緊張大師, 完全唔合作; 唔好話要按摩, 掂吓佢都反抗, 一來眼仔睇唔到戒心又大咗, 二來腳仔痛, 本能反應摸吓都發惡😓!
不過P姐姐經驗豐富, 放慢速度幫波波細心檢查, 斷症吊腳應該係膝關節移位問題, 原來右腳已經比幾年前嚴重咗好多, 移位到達3級程度, 應該好痛喇😓!
起碼知道佢係乜嘢原因腳痛, 當然唔會考慮麻醉做手術, 仲記得好清楚3個醫生都同我講過, 佢有氣管問題, 無關生命危險麻醉唔好制啊!
今時今日仲有埋蛋白尿, 更擔心麻醉藥難以排返出嚟, 又怕更傷個腎仔; 眼仔手術我都唔敢博, 相對膝關節移位, 都唔係無出路非要做手術, 復健按摩都係一個治療方案, 唔係無晒計啦!
P姐姐話波波全身肌肉都繃緊, 都要注意幫佢放鬆, 而今次吊腳係韌帶脫離滑車窩, 連貫縫匠肌嘅韌帶跌咗落嚟(唔知有無記錯, 講解太詳細我記唔到咁多😝), 要慢慢按摩筋膜肌肉幫佢復位; 又要糾正返佢步行重心力, 因為波波腳仔痛, 佢借力就住行, 力度分佈有問題, 導致左右腳肌肉有大細, 長遠怕佢因腳痛而借用埋腰椎發力, 導致腰肌受壓勞損, 咁腰仔都痛埋就死火喇; P姐姐話波波背肌都緊, 要幫佢放鬆返!
不過呢個仔, 邊有咁順攤比人任意作為, 不停掙扎大叫耍手氣速乜都出齊😓, 掙扎一大輪, 做吓休息吓, 最後都叫做比P姐姐做到啦!
呢個仔, 神經緊張又氣管收窄, 郁吓又咳又呼吸差, 日後佢身體再有咩其他問題, 需要治療時, 我真係無眼睇😱!
P姐姐話移位問題按摩係一個好選擇, 可以放鬆肌肉, 支持返韌帶歸位, 但當然呢種治療無可能短缐有效果, 要長遠不斷按摩保養先有作為; P姐姐好好人, 教咗我針對性幾點簡單家居保養, 教我要幫波波按摩邊D位, 希望由我嚟做波波會比較接受啦!
我都要幫波波再減磅喇, 體重減輕膝關節壓力無咁大, 不過減咗又會自己驚一餐, 怕佢身體出問題, 精神分裂啊😥!
按摩睇落好簡單, 但是否做到要做嘅位? 力度速度都要掌握仔細, 專業按摩師仲要顧及肌肉紋理, 我呢D二打六都只可以盡力而為!
約咗P姐姐下星期再上門幫個神經大少, 希望下次檢查後波波會有進步, 我嘅幫助都會有D作為啦!
P姐姐話達達可愛到好似個公仔, 我問P姐姐可否順便幫達達檢查吓, 佢有無大問題?
一直以為達達行得好差, 又腳震又行到似曱甴, 但P姐姐話佢其實好過波波啊!
佢評估達達膝關節移位係1-2級, 肌肉分佈比波波平圴, 整體肌肉亦無咁繃緊, 可以由我自己幫佢日常按摩保養吓; 我見佢有腳震同頸腰無咩力, 咁可能又唔一定關肌肉骨骼問題, 怪唔得幾年前做針灸都無咩幫助, 咁唔通又係個腦傳導問題?
唉, 佢個腦仔....
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
