2018年8月26日星期日

兼容並蓄

早兩晚要鋪滿尿墊戒備嘅可憐豬

波波腸胃應該OK喇, 琴日嘅poo poo都稍微偏軟, 今日正常返晒😌, 有繼續用slippery elm, 有過血便一般需要用4日修復腸道, 感恩波波同順勢療劑夾, 避得到嘅真係唔想用消炎藥喇!

早兩日見佢痾血潺, 見有紅卜卜嘅血其實都驚㗎, 但養狗狗咁多年, 呢種情況一定見過啦, 還幸佢精神胃口好, 就叫自己鎮定D唔使怕; 以前當然會第一時間睇獸醫, 記得獸醫講過, 鮮紅色嘅血多數有關小腸壁受損, 比起暗紅好得多啦!
我呢幾隻豬對西藥負面反應太大, 所以會先試用順勢療法, 如果控制唔到就有必要睇醫生喇!

可能好多毛孩家長會覺得應該第一時間見獸醫, 做法係好個人選擇, 自己最清楚當下情況, 總之出發點係對狗狗好, 無所謂邊種係最好方法, 最緊要對狗狗無傷害, 都係要講"夾"!

其實係有感而發, 關於是否一定要睇獸醫嘅選擇!
好多時網上見到有毛孩家長絕望嘅傾訴, 狗狗情況唔好, 請教有無其他療法幫到; 見到呢類咁desperate 嘅post, 都應該係去到獸醫都幫唔到, 要死馬當活馬醫嘅地步!

正如多年前我叻叻比獸醫宣佈再救唔到, 當時又無獸醫會開中藥, 又無今日咁通行上互聯網搜尋, 想搵多個選擇都無, 還好有寵物店介紹睇無牌中醫, 我都博一鋪啦!
已經到咗無得輸嘅地步, 有多一個選擇有個希望, 西醫幫唔到都可能中藥幫到, 或甚比狗狗最後一程行得舒服, 無咩唔好啊!

但好多時都會見到, 有人分享另類療法, 就有好多狙擊嘅回應, 實在好恐怖!
咁情況祇會比狗狗少咗一條出路, 邊個想比人惡意謾罵, 分享變到吃力不討好?
當然做主人嘅, 自己要冷靜分析人哋比嘅意見係咪好, 好與唔好都係個別夾唔夾到, 有懷疑嘅就唔好做, 唔啱聽唔認同可以直接忽視, 犯唔著一開口就質疑人哋居心唔好!

我一直強調自己要為寶貝把關, 做多D資料搜集, 有疑問嘅甚至可以拎個方案同自己信任嘅獸醫商討啊!
放開成見, 先可以接收到有用嘅資訊, 盲目信任獸醫都未必一定好, 大家都聽過唔少無良獸醫嘅操守唔好, 咁當然遇到過就滑鐵爐啦!
想當初我邊識咩係順勢療法, 都係多得有心人相告!

道不同不相為謀, 明白做到兼容並蓄唔容易, 起碼做到互相尊重就好!
希望大家可以集思廣益, 為自己嘅毛孩選擇到最好!