 |
| 相片連結 |
琴日帶波波覆診, 睇吓眼仔情況是否keep得平穏, 心情難免忑忐, 每次拎成績表都有一定擔心!
其實一早知道白內障後逐會有手尾跟, 太多網上資訊想唔知都無可能, 除非自己唔刻意搜尋, 但我又唔可以唔清唔楚咁; 不過知道越多越擔心, 以致我從來唔敢問醫生, 究竟波波情況去到邊個層次, 我怕知道咗仲傷心!
一直唔敢問, 究竟波波有無晶體移位? 醫生亦無主動相告, 可能都明白有時情況係難以控制, 就算知道咗都無力扭轉乾坤, 都唔想我終日咁擔心!
自問做好心理準備, 琴日鼓起勇氣問醫生, 原來波波左眼晶體已有移位, 仲係移向前房, 比移向後面更嚴重, 不過不幸中之大幸, 仲可以控制住低眼壓水平, 祇要能夠keep住咁, 都已經萬幸; 醫生叫我唔好擔心, 話完全feel唔到波波眼仔有唔舒服, 未到要處理嗰個moment, 唔好理晶體移位問題喇!
佢話好多狗狗失明後已經無再跟進, 情況更壞但無痛感, 主人乜都唔知都係咁啦!
唉, 要理都理唔到啦, 做幾多都係無用, 注定咗嘅命運, 要遇到嘅想躲避都無可能😣!
唯有見步行步, 逐一化解難題, 都無得擔心!
 |
| 波波做完按摩後表情都歡容咗 |
每日都好勤力為波波做復健按摩, 每日三次飯後兩小時後就按吓, 當然同P姐姐專業手法有分別, 但經過指導後, 我都比以前自學有唔同㗎😄!
波波都比之前有進步啦, 大部份時間poo poo都無問題喇, 偶然都仲會企唔穩, 想要去返未出事前健步如飛就有落差!
太多因素影響, 自從眼仔睇唔到後, 呢個仔已經行到窒吓窒吓; 性格都係關鍵原因, 佢自小都細膽, 無其他失明狗狗咁勇, 無豁出去嘅本事放膽跑, 好難去得返從前咁喇!
要接受年紀大咗機能退化, 要接受無法逆轉嘅變化, 只要仲行到痾到, 無影響到胃口差, 我唔再挑剔喇!
要講到胃口差, 我比較擔心達達, 都唔知佢邊度唔舒服影響佢無興趣開餐, 家居用試紙驗尿佢唔算差, 下星期約咗再同佢驗次血睇吓, 好怕又係腦傳導問題, 唔識發出指令叫佢要食嘢啊😰!
我都想年年18歲, 精力充沛皮膚水彈, 但現實迫使我明白, 已經好接受生老病死係自然生態; 其實喺呢方面我改變最大, 以前會千方百計想做到完美無瑕, 見到個仔毛髮變白已經個心揦住痛啦, 多謝我嘅豬仔導向我唔再執著於完美喇!
兩隻豬仔外表當然無年輕時咁活潑可愛, 但相反我對佢哋寵愛隨住時日過去而增加, 無論變老變醜變成點, 佢哋永遠係我嘅"珍寶豬"啊!
但求兩隻豬仔生活過得舒服, 我會盡心照顧, 一切只可以順住條路行!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
