2018年8月29日星期三

世事難兩全

未見醫生脷仔顏色仲幾鮮

今日帶達達驗血, 呢隻惡女超唔合作, 仲難搞過以前!
Dr. Fung話唔好硬來, 見達達奮力反抗脷仔色都變, 今次醫生聽到佢有心雜音, 心臟真係有事, 更加唔敢刺激到佢發癲!

脷仔瘀色掙扎到無晒力😫

比佢休息一輪, 再抱起佢抽血, 隻刁蠻公主之前已經掙扎到筋疲力竭, 佢尖叫咗幾聲就無力再糾纏!
雖然唔順利, 但都總算抽到血, 好過波波少少!

攰死咗!

等報告期間, 個腦不停轉, 要點幫達達個心仔先無風險?
醫生話最理想斷症當然係做超B, 但達達咁抗拒要落鎮靜係必然, 咁就唔排除一定無風險, 唔敢講 100%安全, 要拋返個波比我接!

祇係做檢查唔係治療, 我當然唔想冒險, 咁醫生叫我自己解決, 無數據, 無具體support佢唔會開藥, 又或者其實現階段未有用藥嘅必要!
佢話既然我一向用順勢治療, 可以同療師商討, 試吓從呢個方向先作打算!

等報告時好返少少

個心不停盤算往後嘅打算, 完全唔識擔心今次驗血...
之後聽報告, quit咗隻腦退化西藥7個月, 今日再驗血, 肝酵素真係有下調!
正常ALT range係10-125U/L, 一開始食藥升高到 175, 加咗補肝supplement, 指數都一樣飆, 去到 190!
決定停藥, 今日已經下降到128, 快達標👏; 其他各項指數穩定, 同上一次無大分別!

連豆b在內, 3隻豬對西藥反應都咁負面, 我都擔心波波食咗咁耐西藥去醫個蛋白尿, ALT都應該有超標喇!
決定加補肝supplement, Dr. Fung同意試將蛋白尿藥份量減低少少, 密D監察UPC, 睇吓最低控制量可以去到邊個點, 然後用supplement輔助, 盡量減低傷肝風險!

收到呢個報告, 已經幫我做咗選擇, 我唔會用西藥幫達達, 超聲波無必要, 世事難兩全!
今日一早出去, 中午返到屋企, 個人攰到傻咗, 可能經過一定衝擊, 渾身乏力, 要休息好耐先回到氣!

達達有心雜音我唔意外, 佢脷仔顏色咁差, 心血渾行唔好都預咗, 但從醫生口中確診, 都有無措茫茫然!
兩隻豬仔年紀漸大, 身體終究會出現不同症狀, 但願往後可以活好每一天!