上星期停咗幫波波做復健按摩, 順延至今日約P姐姐幫我上課, 哈哈我咁講都不足為過, 事關呢個仔太抗拒其他人幫助, 我學咗後可以自己幫佢囉!
波波真係超級緊張, 失明後變得祇信任我, 就算老公同阿女摸吓佢都喺戒備狀態, 無可奈何!
雖然約好P姐姐今日上嚟, 但呢個星期黃雨紅雨都出過, 天氣咁差都有D擔心又會再躭擱咗😓, 又要再改期就死火!
還好天公幫助, 今日無傾盆大雨行雷閃電, 終於等到P姐姐應約而來, 我好想知道呢個星期, 我咁勤力幫波波按摩, 究竟自己有無幫到佢啊?!
呢個仔超麻煩, 要長時間熱身, 還好P姐姐比嘅時間充足, 可以比佢放任磋跎, 做吓休息吓囉; 佢要休息時P姐姐就教我, 傾吓講吓咁上課超開心啊!
今日P姐姐一摸波波, 就話佢嘅肌肉放鬆咗好多, 四肢都比上次進步咗, 應該係做咗按摩, 波波少咗痛就敢用隻痛腳, 無卸力單一邊, 所以後腳嘅肌肉比上次平均咗; 雖然都仲係有差別, 但起碼有改善, 我會繼續努力, 有咁嘅結果好滿足啊!
P姐姐話波波韌帶都已經歸位, 即使佢彎曲膝蓋時偶然有滑出, 但伸直腳仔時, 都可以自動移返到正常位置, 仲讃我呢個媽媽做得唔錯😁, 開心死我!
好多謝P姐姐鼓勵, 膝關節移位呢種問題, 復健按摩真係幫到好多, 真係多謝"老師"耐心指導我!
講真祇要幫得到兩隻豬仔, 我從來唔會懶惰, 不過之前全係靠儀器幫助, 我唔識點按摩, 今次有P姐姐悉心教我, 以後雙管齊下, 應該好得多!
P姐姐十月會去墨爾本進修, 希望日後喺復健治療方面更進一步, 可以幫到毛孩更多, 毛孩有福囉!
等佢學成歸來我要問吓佢有無新嘢教我😜, 兩隻豬仔可以受惠更多👍!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
