 |
| 相片連結 |
今日係波波12歲大日子🎉, 媽媽祝願乖仔福星高照, 有貴人護庇, 生日快樂!
過去呢兩年, 個仔真係好多唔妥, 有咗蛋白尿又眼仔盲咗,上個月又膝關節移位嚴重咗…
不過波波好叻仔, 難關難過關關過, 蛋白尿控制得好好, 眼仔睇唔到都接受咗, 關節做咗復健按摩都有進步喎!
唔理咁多, 最重要係日日開心咁過, 要繼續食得瞓得痾得啊!
唔理咁多, 最重要係日日開心咁過, 要繼續食得瞓得痾得啊!
今年都係自己做蛋糕, 當然加足材料, 但無時間研究花巧裝飾喇; 幸好焗制時都聞到香氣撲鼻, 外觀唔專業都唔打緊, 好味最緊要😄 !
波波好賞面, 食到舔晒脷, 我最愛見到佢有呢D表情; 今後每年媽媽都會為乖仔親手做生日蛋糕, 希望佢年年都咁高興!
呢幾日好忙, 阿女出差我要幫手照顧貓貓, 日日出出入入疲于奔命; 忙都係其次, 最慘係貓貓身體有事, 有打電話book獸醫, 但Dr Fung 放大假, Dr Li 又full booking😱!
又唔敢亂撞其他診所, 好驚遇到無良獸醫小事化大事, 護士就叫觀察住, 真係惡化就要去24小時, 一聽呢個建議, 我簡直想死!
 |
| 病到無晒心機 |
whatsapp阿女, 佢叫我定D, 先試吓用順勢療法幫佢, 反正目前見唔到獸醫, 何妨試試!
感謝老天眷顧, 貓貓用咗幾次順勢療劑後, 精神咗DD, 眼仔撐得大DD, 又肯開口食DD, 呢"DD, DD" 得來不易!
今日貓貓已經好咗好多, 雖然未100%恢復胃口, 但都有跳上跳落抓貓樹, 肯郁肯玩係好事, 週末阿女回歸, 都比到個交待佢; 有病會掛心D, 呢幾日我大部份時間都去咗陪貓B, 連乖仔過生日都無時間陪佢, 真係對佢唔住😔!
其實點放心交比工人姐姐睇住兩隻豬😓, 但無辦法, 受人所託、忠人之事, 唯有靠webcam mon 住, 呢兩個老人家又多多事, 我成日出咗去, 都真係好掛住!
每日臨出門前都非常、十分、鄭重咁交帶工人姐姐, 家務唔好做, 乜都唔使理, 淨係睇住兩隻豬, 一定要確保佢哋安全無事!
工人姐姐都接受指令, 肯跟足我指示, 坐定定睇住😊!
無論日常做家務時佢有幾多失魂錯漏嘅事, 只要佢用心關顧好我兩隻寶貝豬, 足以抵消佢所有不足之處!
 |
| 還好我出咗去, 佢哋一於做爛瞓豬😄 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
