 |
| 相片連結 |
豆b離開呢兩年間, 波波達達健康變化好大, 波波蛋白尿又眼盲, 達達心臟有雜音, 但我比以前冷靜好多喇; 俗語話年紀大機器壞, 意料中事, 祇係睇吓係邊個器官先變壞!
我明白一切無例外, 生命就係生老病死咁循環, 但亦會有情緒起落啦; 有時信心澎湃, 滿滿正能量, 對照護好佢哋信心好大, 有時又好洩氣, 覺得往後嘅路越來越難行😣!
波波眼仔失明後, 極抗拒睇醫生, 其實佢抗拒接觸任何人, 還好仲可以去眼科, 因為從開始踏入診所直到進入診症室, 整個checkup都係由我手抱, 佢比較安心; 做眼仔檢查非入侵性, 都唔使掂佢, 咁樣檢查先有可能!
如果可以順利做檢查, 我一定聽話, 每四個月去眼科覆診, 我都應約而行, 但要抽血嘛, 會嚇到佢猛力掙扎緊張到快休克, 真係免喇!
蛋白尿數據仲可以驗尿, 其他器官好壞, 都豁出去, 唔知也罷, 唔想迫佢面對緊迫環境, 令佢唔開心; 希望保住食得瞓得, 其他唔再諗!
以前都仲可以帶佢見老師做reiki, 但失明後佢好反感, 最後兩次見老師, 佢唔肯上治療床不特緊, 我手抱住都猛擰轉身, 咁遑論抽血見醫生啦? 我係唔會為做一個檢查落藥鎮靜咁傷身!
今次做上門復健, 都係呢個原因, 屋企係佢熟識環境, 不過都要好長時間熱身!
以為達達比波波較容易控制, 以前呢個係事實, 但近年幾個月就去一次抽血, 佢好有戒心; 早幾日同公主去一轉見醫生, 佢奮力反抗脷仔都黑, 返嚟足足瞓咗兩日, 死豬咁!
可能佢全力反抗, 體力透支過甚, 見佢攰成咁我有D後悔帶佢去抽血, 又有D擔心!
今後應該唔會咁密見醫生喇, 呢個年紀又心仔唔好, 順從嬌縱都唔過份!
老公超肉赤, 叫我唔好再令佢壓力添增, 既然今次停西藥驗血, 肝酵素有下降, 都顯示咗3隻豬食西藥各指數failed嘅原因, 唔好再搞佢喇, 出入診所要佢受驚嚇, 會有反效果, 會加重負擔比佢個心!
西藥應該唔會考慮喇, 都係屬意替代療法, 既然達達同順勢療法夾, 都無再抽筋, 就先向呢個方向行, 反正現階段除咗西藥都仲有選擇, 除非去到別無他法; 再睇咗順勢藥網頁嘅一個review, 更堅定咗我嘅信心, 順勢療法可以幫到達達!
要再同順勢療師商討, 幫佢心仔做個計劃, 希望穩住壞嘅速度變慢!
怪唔得每次阿女做reiki, 都話達達比波波差, 個心麻麻, 當時都無醫生有提及, 甚至5月時去睇醫生, 聽診都無話有雜音, 原來靠雙手仲敏感過聽診, 另類療法真係奇妙到令我越來越信任!
我唔敢講我為佢哋選擇嘅路一定啱, 但我一定係為佢哋好先咁行, 一家人商量下嘅結論, 都係要佢哋活得舒服, 日子長短唔係關鍵, 最仲要大家活得開心, 唔想要佢哋惶恐終日!
我會再試加入中藥嘅supplement, 比兩隻豬仔再試吓, 睇睇反應, 希望佢哋接受到, 多少都幫到吓!
同好朋友V傾咗個電話, 個心舒服晒, 志同道合就係咁解, 好多謝佢比我信心, 每當我有困擾都力撐!
會記住佢對我講過嘅說話"Trust your instinct"!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
