終於收到從英國寄到嘅西藥同補充品, 今次一波三折, 9月1日落嘅order, 已經等咗廿幾日, 等到好心急; 藥廠話要等足 35日先可以claim寄失, 如果咁等, 再等佢重寄, 咪起碼要50日?
我無預算時間要咁耐, 咁等法波波嘅蛋白尿藥實run out, 為安全計已經再落order, 每款先寄一盒, 唔想個仔無藥身體有任何閃失; 果真意外係無得計算, 何等真實😔!
今日收到第一份order喇, 頭尾足足26日, 前所未有等咁耐, 我真黑; 見到呢堆嘢真係又愛又恨, 用咗呢隻蛋白尿藥, 好多中西草藥會有相衝都唔用得, 想搵輔助品有困難, 但唔用呢隻藥又唔得, 即使我用埋補肝supplement, 但我估波波肝酵素都一定爆燈!
上次帶達達見醫生, 都有講及波波用蛋白尿藥問題, 雖然現階段用西藥係控制得好好, 但我根本check唔到隻藥對波波有無做成其他器官傷害, 有無好大副作用!
醫生都同意我D豬仔嘅身體狀況, 長用西藥都真係有D擔心, 本來我想加入中藥補充品, 慢慢試減西藥份量, 但用咗台灣嘅中藥配方'腎興'又唔太夾, 想用都唔得!
如果單方面減西藥無其他輔助根本無可能, 感覺無助時, 突然諗起順勢療法送比我嘅小冊子, 即刻重溫!
一直以為用緊呢隻西藥唔可以用草本, 好開心見到原來用Astragalus係可行, 雖然之前波波用過無明顯功效, 但唔做主力做輔助都有幫助嘛, 起碼波波之前用過無不良反應, 我會較放心; 不過確保安全下, 都係要問清楚 practitioner 先開始喇!
好快得到回覆, 我會跟建議試吓, 當然唔敢停晒西藥, 以前睇梁醫生時已經試過失敗, 祇想減少少劑量, 希望搵到個平衡, 食少一分得一分; 希望幫到波波減低西藥副作用之餘, 佢又感覺舒服, 我就安心!
如果打算減蛋白尿西藥, 必須加密監察UPC ratio, 最好有個數據指引; 好感恩老天總係喺適當時候助我一把, 無端端比我搵到一間英國健康用品店, 可以shipped UPC urine stripe, 原來我都未係好黑, 仍遇到幸運之神!
同係從英國寄出嘅醫療用品, 由落order 至到手一星期搞掂晒, 佢哋出貨好快, fit 晒我呢D咁心急嘅人😆!
呢間係專門供應home health test產品, 我收到呢個shipment最開心!
當然我唔會單靠呢D試紙, 但可以有個參考data, 無加重波波壓力下做嘅test, 我唔抗拒啦!
用試紙可以幫輕咗密密送化驗所嘅負擔, 無咁重皮嘛😜; 冥冥中好似一切都安排好, 我就朝住我嘅目標進發!
早前打咗一場大風, 已經好耐無十號風球高掛, 而今次暴風威力超大, 成棟樓都有D搖擺, 感恩身邊親朋戚友身體平安, 勁風已過去喇; 同大家分享一段風暴過後嘅反思, 好有意思啊!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
