 |
| 相片連結 |
波波腳仔有事都幾個月喇, 情況時好時壞, 有時行得好好, 有時又趷吓趷吓, 唔通年紀大咗, 復原真係咁困難? 還是根本無機會復原, 衹可以接受現狀喇?
天氣轉變都無同佢哋出去行, 見波波行得麻麻都無動力出去逛, 喺屋企比佢慢慢練習, 比佢自己決定要唔要行, 不過本能都識痛就停低坐吓; 達達雖然惡死騰騰成日張口鬧, 但見到佢對波波好關心, 見波波返帳篷坐低, 會走過去慰問, 呢對歡喜冤家相處模式好趣怪!
我自己嘅膏肓炎都有兩星期喇, 背肌疼痛上午還算OK, 到中午已經感覺有痲痺, 越夜疼痛越強勁, 到晚上就痛到死, 痛症都分時段真係玩死; 阿女話我成日咁抱住波波, 隻手長期兜住佢屁屁, 因住有埋媽媽手, 手腕都痛埋到時真係都唔知點處理, 呢度痛嗰度痛真係會想死, 唔聽勸告叫我咪痛到發脾氣; 但我唔可以漠視波波嘅需要, 我答應過嘅諾言係唔會背棄!
琴晚, 阿女送比我一件袋鼠圍裙, 佢話我用電腦或食飯時, 放波波落去前袋會幫我卸吓力, 可以空出雙手唔使太就住就住, 波波有件衫包住應該有更大安全感, 喺冬天用好溫暖好合適!
試咗又唔錯喎, 起碼唔怕跌咗波波落地, 兩隻手都可以揮灑自如, 多謝阿女體貼嘅心意😍!
雖然幾隻豬仔都多多事, 但老公同阿女一直到咁支持, 從來對我做嘅決定無質疑, 都會分享睇法, 剖析道理, 視豬仔係家中一份子, 唔會冷眼旁觀咩都唔理; 我好幸運沿途有佢哋, 令我更有力量照顧兩隻豬🙏!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
