就快過農歷年, 仲有兩星期多, 兩隻豬仔嘅本命年即將過去, 呢一年算係少驚無險, 有貴人護庇, 身體狀況都算係OK; 快踏入豬年,又要睇睇對兩隻豬仔有無相冲, 有需要時就要搵件吉祥物化解咗D煞氣; 我自己從來無做呢一套, 但為咗兩隻豬仔, 做開嘅就繼續做, 就當我八卦, 算我老土到痺😜!
2019己亥年, 屬狗嘅有病符凶星照命, 咁寧可信其有, 要為兩隻豬仔求個平安, 免被干擾, 即照指引買咗個「梅蘭鶴喜」吉祥物比佢哋, 特別揀咗個雙鶴圖案比兩隻豬, 掛喺佢哋床頭化解流年不利, 保住兩隻豬仔健康平安, 自己心安理得做得歡歡喜喜😆!
再訂做咗個健康御守比佢哋, 做多D圖個心安, 盼望福星高照兩隻豬, 從來無祈求橫財就手, 一本萬利呢D, 祇求一家齊齊整整互相扶持, 身體健康出入平安, 就於願足矣!
 |
| 要健康啊! |
早幾日又比達達嚇到半死, 我偶然摸到佢肚仔有一硬塊, 位置喺最低嘅乳頭側, 摸落好硬又唔規則, 個心即時往下沉, 心諗咁唔好彩又遇上呢D頑疾; 不過係佢哋開餐時間, 比佢哋食咗先再諗啦, 自己都要冷靜落嚟再安排, 太衝動做錯決定仲禍害大!
強按住心亂如麻, 抖起精神服侍兩隻豬晚餐, 痾埋便便一切搞掂晒, 就抱達達埋身再檢查吓, 確認吓個硬塊有幾大...摸唔到喎, 突然消散晒?!
老公話係咪便便落到腸未排, 依家痾咗poo poo咪無晒囉😅; 真係從未諗過有咁烏龍, 亦未遇過有咁滑稽, 個玩笑開咁大, 比佢嚇一嚇真係死咗好多細胞, 但呢種來回地獄又折返人間嘅感受, 相對又比我哋歡悅好大!
 |
| 想嚇死人咩! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
