 |
| 相片連結 |
琴日中午好好太陽, 見咁耐無同兩隻豬仔出街, 就同佢地出去逛逛; 落到樓下感覺雖然係太陽好大, 但風都好大, 好彩有同兩隻豬仔著咗件薄薄嘅棉質衫仔, 都頂得住卦!
盡量行有陽光照到嘅地方, 咁就唔怕凍啦, 行咗都無一個鐘, 就夠鐘食午餐, 打道回府喇!
去完街街係胃口好D, 兩隻豬仔都好快食清晒, 食飽飽正常比佢哋去瞓晏覺!
兩隻豬仔乖乖咁瞓覺, 我就執吓嘢啦, 依家個個都話「斷捨離」, 我都要狠下心腸, 將D唔用嘅嘢放棄喇, 成日買買買, 間屋邊有咁大地方擺!
年尾時間屋苑有做捐獻活動, 將物品送比有需要嘅人, 無論新舊物品, 都可以拎落會所有人安排, 咁方便唔使自己運送, 要大刀闊斧咁清屋喇; 事實好多嘢都只係用過一兩次, 亦有全新, 但唔用又唔捨得就咁揼, 霸佔咗好多空間嘛; 既然可以捐助他人, 自己又可以清空地方, 助己助人啦!
忘我咁做, 時間過得特別快, 一眨眼又到豬仔晚餐時間, 當然要服侍公主少爺仔先啦, 佢哋最大!
達達胃口麻麻, 食得好慢, 不過都食晒; 食完放返佢上床, 突然見佢將食嘅嘢嘔返晒, 好似仲嘔得多過食落肚嘅份量, 搞咩呀?
老公話係咪出街吹咗風, 凍親阿公主殿下?
吓, 都著咗件薄衫仔喎, 乜公主依家咁潺? 見佢嘔完後無晒力, 企到搖吓搖吓, 好陰功豬呀!
同佢做好清潔放返佢上床, 比佢好好休息吓, 自己就坐喺佢身邊觀察住, 希望無事啦!
達豬休息後OK喇, 又開始鬧人, 見佢中氣十足聲大大, 咁都無咁驚啦!
今日見到太陽都好好, 但唔敢出去喇, 唔敢日日出去, 驚佢哋消耗精神太大, 琴晚見到達達嘅反應, 我怕怕喇; 年紀大咗真係唔同以前, 食飽飽都係瞓餐飽啦!
我自己就睇吓書啦, 靜靜咁陪住兩隻豬仔身邊, 好好享受寧靜嘅相處時間!
 |
| 動物傳心師始祖Rsoina Maria Arquati |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
