2019年1月6日星期日

補償唔到

多謝A報料, 靚靚松松月曆終於收到, 要代購都等咗好耐, 不過, 我已經習慣等待, 再無以前咁心急好似鑲咗彈弓!

仲有阿女送比我嘅3豬 cushion, 從設計、揀選嘅字句都好窩心, 多謝佢送禮物會從呢個方向去著墨, 知道我收到呢種禮物最開心, 個女咁有我心, 我真幸運!

每個cushion 我都好鍾意, 但其中最愛就係豆b,可能呢個唔係佢最靚嘅image, 但佢呢個眼神我永遠唔會忘記...
以前, 佢總係咁靜靜望住我, 直到最後, 直到要別離....
呢個眼神, 就凝聚咗喺我個心, 永遠停留盤據!

近排特別多窩心嘅禮物, 阿女又從美國訂購咗呢個別具意義嘅相架送比我, 就連沖晒相片店, 今年都無端端送我一份生日禮物😍!

上網搜尋先知, 原來我唔係肩周炎, 係叫做膏肓炎, 痛處係上背嘅肩胛骨, 主要係因為經常重覆使用相同部位嘅肌肉, 或是因坐姿不良、長時間使用電腦，使肩膀長期處於緊繃嘅狀態, 導致上背部肌筋膜發炎、疼痛等等!

我有呢個痛症都有跡可尋, 自從波波失去視力後, 經常要我抱, 咁我打電腦又抱, 甚至自己一日3餐都抱住, 又要就住就住, 有姿勢不良都係正常不過, 唔使諗...
唉, 都手尾長, 痛起上嚟都好夭心😟!

但我唔會拒絕波波, 我對佢虧欠太多, 如果唔係我警覺唔高, 可能佢仲睇到, 就唔會無晒安全感時刻要抱; 想當日帶佢睇專科, 明明佢眼仔有脹卜卜, 呢D應該係眼壓高, 佢不停卒眼應該係有痛; 但專科醫生話佢正常, 卒眼係敏感, 我當然感覺良好, 主觀意願一定希望佢乜事都無, 對於佢眼凸凸, 好似有鬼揞眼視若無睹; 當然專科醫生嘅診斷影響最大, 比咗我太大信心!

如果我無帶佢睇專科, 當日就咁跟隨普通醫生, 一直幫佢滴降眼壓藥, 歷史可能會重寫, 佢就唔會飽受煎熬, 去到失去視力嘅地步!
呢個一般人視為神一樣嘅眼專科醫生, 曾經係咁好...

好記得第一次帶波波轉睇熊醫生, 佢拎住波波嘅病歷話佢青光眼, 眼壓高...
專科醫生從來無對我講過波波有呢個問題, 亦無開過降壓藥, 點解佢比出嘅病歷, 同對我講嘅會唔同?

無咗一對水靈靈嘅眼仔, 睇落老咗好多😢

佢一直都話波波眼仔健康好好, 有天生一點白內障, 但呢點唔會擴大, 亦唔會影響佢視力; 而每年去檢查, 都係話keep得到, 話白點無大到; 到感覺波波眼仔唔好, 提早check up, 突然又話佢白內障已經睇唔到, 要做手術...
白內障惡化得咁突然? 仲要兩隻眼一下就睇唔到? 唔係循序漸進? 乜解釋都無!
keep住睇專科又點? 年年檢查又有乜作用?

一切係命數, 人生太多遺憾太多過失都追唔到, 每見到波波亂咁舂我心都好痛, 只係我點做都補償唔到, 對專科兩個字我依家好卻步!