琴晚阿女同我講, 菲律賓女歌手Lea Salonga 農曆年間會喺尖沙咀文化中心開concert, 佢係一個國際知名嘅百老匯女歌手, 亦係第一個可以上到broadway嘅亞洲人, 上次佢來港表演阿女有去睇, 今次都會同朋友去睇正式場, 但特別在今次會做2場回饋同鄉, 超難得!
因為佢係菲律賓人, 特別減票價做兩場比賓賓, 祇係 $200一張門票, 阿女話工人姐姐咁鍾意唱歌跳舞, 叫我問工人要唔要去聽, 係一個難得嘅機會, 咁平門票場租都唔夠比, 真係做慈善咁做, 如果姐姐有興趣, 佢買兩張門票比佢同朋友結伴去欣賞啦!
今早我問姐姐, 要唔要去聽Lea Salonga嘅concert, 佢表現好雀躍, 但就話要 3張門票, 佢想同兩個朋友一齊去聽; 講真一開始我有D唔開心, 都已經有考慮無人作伴去聽好無癮, 買多張門票比佢同朋友一齊開開心心, 後來就咁諗, 可能兩個都係佢好朋友, 又唔想飛起其中一人...
好啦, 3張就3張啦, 等佢願望成真; 姐姐好開心, 開心到標晒眼淚, 一連串咁講菲律賓有 3個地方, 而呢兩個朋友係來自同一家鄉, 在港一向都親近, be-le-ba-la講到好興奮, 見佢咁開心, 我莫名其妙都開心埋一份😜 !
 |
| 買到咁好位, 佢真好彩, 阿女自己正場嘅位都無咁靚! |
好開心阿女會為個工人姐姐喺呢方面去諗, 我只會諗有咩好食預佢一份, 無照顧到精神食糧呢層喇😄!
希望姐姐感受到我哋對佢嘅關心, 最終講老實, 你好我好係正常人, 我都係想佢睇住兩隻豬仔時要格外留神啦!
呢個工人姐姐, 講真...做嘢唔多醒神, 但心地唔壞係真, 亦睇得出佢真心愛小動物, 對兩隻豬仔都肯用心, 雖然, 好多時都係大意到激死人; 但人無完美, 之前亦曾領教過D衰工人, 對呢個姐姐我要求唔會過份, 將將就就咁過日晨, 大家都開心啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
