今日係達達豬14歲生日, 祝願公主食得瞓得, keep住有火氣閙人!
呢幾年我已經無特別為佢哋慶祝生日, 年紀大咗活著嘅每一日我都感恩, 亦唔敢隨便加餸, 依家追求穩定係我首要原則, 不過阿女都買咗honest kitchen嘅 turkey bone broth比佢, 話間中換吓口味, 仲有雞茸小食, 少少哋OK啦!
上次達達縮起前手去睇醫生, 都估計達達係年紀大血液循環較差, 壓住手仔瞓覺會有手痺, 除咗日常物理治療, 我有考慮用中藥同佢調理!
但太勁嘅中藥我唔敢試, 過去經驗佢哋曾經用過嘅中藥都會喘氣, 所以要小心啲!
多謝好朋友A幫忙, 比咗達達一款中藥試試, A對中藥素有研究當然亦有問過中醫, 呢隻藥方好溫和, 主要作用係養心脈, 益氣滋陰,不妨一試!
已經食咗有2星期, 無不良反應無喘氣, 時間尚短亦無見到好卓越嘅效果, 但有一樣明顯分別.....
食中藥咁耐以來, 達達一日三餐都唔使我手餵, 即係佢胃口好OK！
已經有好長嘅一段日子, 佢胃口都係時好時壞, 真係好耐未試過唔使手餵可以持續兩星期, 我希望呢個改善係意味因為呢隻中藥啱佢!
無不良反應我就敢繼續落去, 唔敢奢望有好大改善, 但求佢肯食已經好好, 可以提高佢生活質素已屬完美!
早兩日同達豬沖涼, 順便修吓毛毛, 波波走咗呢兩個月我乜都唔想做, 對達達儀容都少咗照顧😣!
自從知道達達心臟唔好, 已經減少咗浸微泡, 上次睇馮醫生話佢心雜音有4級, 我就決定以後停止微泡浴; 其實沖涼對心臟有問題嘅狗狗係好大burden, 我要一直留意住佢反應, 睇佢有無唔舒服!
好慶幸買咗呢個VUUM吹毛系統, 沖完涼放佢落個吹風箱吹住暖風好舒服, 佢可以靜靜休息回氣; 無咗呢個箱, 我真係好難叫佢合作唔掙扎唔大聲嘈, 咁激動真係唔好, 但佢一直都最憎用吹風機吹毛毛!
最鍾意睇佢吹乾毛毛嘅肚仔, 白雪雪毛茸茸😊!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
