似乎係我緊張過度, 一見達達縮起前手又企唔到, 即刻諗咗去最壞嗰度, 可能受外來影響亂咗我嘅思路....
亦唔好推説其他, 原來潛意識我嘅憂慮一直喺度, 只係迫自己唔好想, 自問緊張性格真係好難改得到!
觀察咗一日, 發覺達達嘅不適係唔同舊日, 佢唔似抽筋, 亦無尖叫休克, 應該唔關心肺功能; 觀察下佢祇係縮起右前手, 其他三隻腳都郁得, 又唔似中風影響半邊身, 再金睛火眼望到實, 見到佢去尿尿轉圈時係行得唔穏, 明顯無將力度放喺前手, 有啲失平衡!
感覺係整親手, 但完全唔知來由, 點解無端端會拉傷咗前手?
佢又無跑無跌親, 除咗每晚打拳摹仿葉問, 唔通咁都挫親?
琴日開始focus喺佢筋骨, 照紅外線燈、場效應熱敷、按摩再加針炙筆!
之前可能有痛, 令佢表情呆呆又唔郁, 真係比佢嚇親, 今日見佢稍有好轉比較放心!
呢兩日佢都食得瞓得都算精神, 如果只係拉傷筋骨, 希望佢休息後會有自我修復嘅可能, 呢種受傷需要時間, 呢個結論係目前嘅觀察, 要比時間再睇睇有無其他變化!
我真係唔適合再養毛孩, 比太多過往經歷嚇怕, 總之有關豬仔嘅任何變化, 事無大小都嚇餐飽, 死好多細胞!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
