朋友嘅狗狗琴日離世, 3個月前仲問緊我有關眼仔嘅補充品, 生命流逝真係有如微塵....
喺一年半裡面佢送別咗3隻狗狗, 心臟要有多強大先可以挺過呢種傷心? 我諗吓都全身打震!
不過就算挺唔過都要硬吞, 根本選擇不由人!
生而為人, 真係要面對好多遺憾, 對唔甘心嘅最後都妥協了, 唔情願嘅都要接受, 只能夠竭盡所能!
快立冬喇, 雖然日中仍要開住冷氣, 但個心已有寒冬嘅感受, 喑喑嘅天色喺呢個近年尾時候, 懷念離開嘅毛寶寶亦懷念故友, 佢哋都係秋冬嘅時候往天國走, 感覺有如被凜冽嘅北風吹向心頭!
琴晚同阿女又講起波波, 佢輕輕一句"唔好再傷心, 記取好時光"即時觸動我眼淚狂流, 失去波波嘅痛係前所未有....
理性上我好安慰佢已脫離病痛, 瞓住覺好安詳咁走, 從此唔會再比佢殘缺嘅身體控制佢嘅自由, 但感性上我實在係好唔捨得, 從此同佢天各一方, 唔可以再相伴相守....
如常照顧達達, 佢應該有感覺波波已走, 剩低佢一個有唔開心, 亦影響咗佢胃口; 往常已經時好時壞, 依家仲要餐餐又求又氹先肯張大口, 還好未至於要force feed咁頭痕; 年紀大胃口唔好都有擔心, 雖然呢個狀況產生已唔係近日, 我亦無可奈何咁接受, 但求手餵佢肯吞, 已經係萬幸!
 |
| 工人姐姐比佢食會合作啲， 再唔食我就要手餵😅 |
活到今日, 已經做咗大半世人, 經歷咗幾個毛孩嘅離開, 先開始有成熟嘅悟感; 依家面對住鍾意嘅嘢依舊會鍾意, 但接受唔一定要擁有, 面對害怕嘅事依舊會害怕, 但可以面對、硬哽, 呢種頓悟應該係悲哀定感恩?
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
