達達去見完醫生, 呢兩日都攰到成日瞓, 如果之前無呢種經驗, 見佢整日攰到咁, 我又會好擔心!
不過見到佢手仔無再縮起, 已經有明顯改善, 尿尿時轉圈亦無再搖搖擺擺可以行得穩了!
可能有部份毛孩唔怕去睇醫生, 但我估大多數對去診所都會有戒心, 可能出於本能🤔！
我唔知道往後可以點幫佢, 祇可以盡我所能, 例如照紅外線燈、按摩、音义治療、仲有拎紅外線氈比佢瞓;不過達達體質唔同波波, 佢好怕熱, 佢唔肯好似波波咁瞓喺氈上面, 只可以用床單蓋面, 所以我之前都做咗兩面氈墊, 佢瞓喺上面應該唔會熱!
時間嘅巨輪不斷咁轉, 好多事物都會改變, 不過唔會令記憶磨滅, 但悲傷確係得以變淺; 早兩日帶達達見馮醫生, 多謝佢過往對波波嘅照料, 當講起波波時, 我竟可以控制住唔再淚流滿面, 祇有些微哽咽!
當然呢塊心頭肉我每日仍不停想念, 但我已經努力學習去想曾經嘅得著, 而唔再係一直徘徊喺失去嗰方面!
然後, 微笑住去想, 波波豆豆呢對孖寶, 應該係天堂正在開心玩耍哈哈笑!
兩隻豬要乖, 要好好相處喺平行時空嘅另一邊, 媽媽會喺呢一邊依舊陪住你哋過每一日, 直到再見面!
 |
| mp4-親愛的謝謝你 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
