琴日, 收到從台灣訂購嘅書喇, 從付款到收貨祇須5日時間, 真係好快!
琴晚開始閱讀, 但我改變咗以前閱讀嘅習慣, 以前我會好心急, 一口氣粗略咁睇一次, 先睇咗個大概, 再決定會唔會從頭再睇!
其實咁會忽略咗好多細節去思考, 因為忽略咗細微嘅要點, 就失去咗重讀嘅打算; 今次我改變咗, 一切要慢, 慢慢睇慢慢感受慢慢將我心急嘅性格調較.....
讀書, 讀到一本剛切合當時心情嘅書, 真係一個好好嘅心靈慰藉, 今次我買嘅呢兩本書, 其中一本係睇到網友推介, 呢個題材嘅書本其實我已經睇過好多, 豆b有病嘅時候我不停睇書學習, 到波波嘅時候我反而無再睇書喇!
但到波波走咗, 我又開始去諗如果我有睇多啲書, 會唔會做得好啲? 當然呢種感覺, 係失去親愛嘅毛孩後, 好多人都會有類似嘅常態!
今次買呢本"寵物終老前還能為心愛的牠做什麼", 吸引我嘅除咗係題目(其實呢類題材我書架上都有喇), 主要係因為作者, 因為我之前有睇過佢寫嘅文章, 我係有感動嘅!
以一個獸醫身份再學習同動物溝通, 佢對動物嘅熱忱可以從文字中感受到, 所以見到佢出書, 我一定買!
屋企剩返達達豬, 已'美人遲暮'喇, 希望睇咗呢本書, 會比我不同嘅啟發, 喺佢有生之年得到更好嘅照顧啦!
另一本我買嘅書"牠不在, 但都懂", 係完全無料到我突然就留意到, 好感恩上天有呢個安排; 琴晚我首先開始睇呢本, 一路睇一路引証咗我過去嘅遇見, 唔係幻覺係發生喺我真實世界!
我見到豆b, 被一團黃光圍住, 全身發出透明嘅光坐喺佢床仔, 靜靜咁望住我, 我一共見到佢有兩次....
而波波, 我聞到過氣味, 聽到好多次佢嘅叫聲, 早兩日仲感受到佢瞓喺我臂彎.....
 |
| 愛在, 他們仍在 |
原來一切唔係我自己諗出嚟, 係我真實嘅感受, 佢哋返嚟係話我知, 即使佢哋到咗另一個世界, 佢哋仍深愛我, 我哋呢份情緣仍一直連繫住....
愛在, 你就在！
呢本書, 的確可以帶比我心靈慰藉, 我會推介比你, 如果你仍在傷痛於失去心愛嘅毛孩!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
