呢兩個多月來, 間中都會聽到波波嘅聲音, 有剎那間我會忘記咗佢已離開; 今早我喺廚房, 又聽到波波吠, 我叫老公入房睇吓乜事, 我話豬仔吠呀, 快入去睇睇?
佢以為我講達達, 就入房睇睇, 然後佢話達達瞓咗, 無吠呀....
我呆咗一呆, 然後問佢到底有無聽到狗狗吠嘅聲音, 佢話無啊....
我再問工人姐姐有無聽到, 佢碌大雙眼搖頭, 用一個好怪嘅表情望住我, 佢應該以為我思覺失調吧!
原來乖仔祇想同我溝通, 因為佢知道我渴望佢返嚟!
琴日我同達達一齊瞓晏覺, 屋企好靜, 因為工人放假老公又未返嚟, 我合上眼未瞓著時, 就感覺到波波瞓喺我嘅臂彎, 同往常一樣嘅姿勢; 我唔敢郁亦唔敢睜開眼, 怕呢個感覺一瞬即逝!
呢個係除咗聲音之外, 我第一次嘅實質感覺, 我確信波波有返嚟, 已經停咗嘅眼淚, 一吓子再氾濫, 波波啊, 媽媽太想念你.....
過往, 我會好懷疑係自己嘅幻覺, 即使幾年前豆b離世後返屋企, 我見到佢仍半信半疑, 但幾位喺呢方面有研究嘅朋友話我知, 唔好懷疑, 佢係有返嚟見你!
最近, 網上朋友介紹我睇一本書, 無意中睇到另一本嘅介紹, 我即時從台灣訂購返來, 冥冥中喺呢個時候比我接觸到呢本書, 係天意?
書裡面嘅描述, 真係有我親身體驗, 對回魂呢個解說, 我唔再懷疑!
我嘅乖豬豆b同寶貝波波, 佢哋一直都無離開, 一直都有返嚟探我, 與媽媽同在..... mp4 - 刻在我心底的名字
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
